پنڈدادنخان: کھیوڑہ سالٹ رینج کے پہاڑی جنگلات میں لگنے والی آگ پر 20 گھنٹے بعد قابو پالیا گیا، آگ کی وجہ سے 100 ایکٹر جنگلات کا رقبہ متاثر ہوا۔
تفصیلات کے مطابق پیر کی شام سے جہلم کی تحصیل پنڈدادنخان میں کھیوڑہ سالٹ رینج کے پہاڑی جنگلات میں لگنے والی آگ پر مکمل قابو پالیا گیا، آگ کی وجہ سے جنگلات کا سوایکٹر رقبہ متاثر ہوا ہے، مسلسل 20گھنٹے آپریشن کے بعد آگ پر قابو پایا جاسکا ہے۔
ریسکیو حکام کا کہنا ہے کہ سگریٹ یا کوئی جلتی ہوئی چیز جھاڑیوں میں پھینکنے کی وجہ سے آگ لگی، تیز ہوا کی وجہ سے آگ میں شدت میں اضافہ ہوا۔ آگ سے بنگلہ پہاڑی، سوہال اوروادی توپر کے جنگلات متاثر ہوئے۔
ریسکیو حکام کا کہنا ہے کہ جھاڑیوں میں لگنے والی آگ کو بجھانے کے لئے عملہ فائر بیٹرز کے ذریعے اگ بجھاتے رہے ۔ اس آپریشن میں ریسکیو 1122 جہلم، پنڈدادنخان اور ریسکیو چکوال کی ٹیموں نے حصہ لیا۔
ریسکیو حکام کا یہ بھی کہنا ہے کہ آپریشن میں محکمہ جنگلات، ایل سی آئی اورنجی سیمنٹ فیکٹری کی ٹیمیں بھی شامل ہیں تاہم پہاڑی اوردشوارگزارعلاقہ ہونے کے باعث فائر فائٹرزکومشکلات کا سامنا کرنا پڑا۔
یاد رہے کہ جہلم کی تحصیل پنڈدادنخان میں 27 مئی کی شام کو سالٹ رینج کھیوڑہ کے پہاڑی جنگلات میں جھاڑیوں میں لگنے والی آگ درختوں تک پھیل گئی تھی جبکہ ریسکیو حکام کو 28 مئی کی صبح اطلاع دی گئی تھی۔
