اونٹاریو: اونٹاریو پارلیمنٹ میں تین سال قبل لندن اونٹاریو میں دہشت گردی کا شکار ہونے والے پاکستانی خاندان کی یاد میں خاموشی اختیار کی گئی۔
جون 2021میں 46سالہ سلمان افضال، 74 سالہ طلعت افضال، 44سالہ مدیحہ سلمان اور 15 سالہ یمنیٰ افضال گھر سے شام میں چہل قدمی کےلیے نکلے تو مذہبی تعصب میں مبتلا دہشت گرد نے انہیں ٹرک سے روند دیا تھا۔
اونٹاریو پارلیمنٹ میں پاکستان نژاد رکنِ پارلیمنٹ ذیشان حامد نے پوائنٹ آف آرڈر پر اسپیکر سے درخواست کی کہ ایوان سے لندن اونٹاریو میں تین سال قبل اسلاموفوبیا اور دہشت گردی کے واقعہ میں اپنی جانیں گنوانے والے افضال خاندان کے چار افراد کی یاد میں خاموشی اختیار کرنے کےلیے اتفاقِ رائے حاصل کیا جائے۔
اسپیکر پارلیمنٹ نے اس قرارداد پر ایوان سے رائے مانگی تو صوبے کی تمام سیاسی جماعتوں نے اتفاقِ رائے کا اظہار کیا جس پر پاکستانی خاندان کی یاد میں خاموشی اختیار کی گئی۔
