سوہاوہ: تحصیل سوہاوہ، ڈومیلی اور گردونواح میں موسلادھار بارش نے تباہی مچادی،متعدد بستیاں اور نشیبی علاقے زیرآب آ گئے، متعدد منی ڈیم ٹوٹ گئے، ریسکیوٹیموں نے متاثرہ لوگوں کو ریسکیوکرکے محفوظ جگہ منتقل کردیا، بودلہ سے شہر کوجانےوالی سڑک پانی میں بہہ گئیں، بڑاگواہ اور گردونواح میں 144ملی میٹر بارش ہوئی۔
تفصیلات کے مطابق ضلع جہلم میں چار روز سے جاری بارش کے سلسلہ نے تحصیل سوہاوہ، ڈومیلی، بڑاگواہ اور گردونواح میں تباہی مچادی، بارش کے باعث نشیبی علاقے زیرآب آگئے، گلیاں نالیاں تالاب کامنظرپیش کرنے لگی۔
ڈومیلی کے علاقے میں بھاٹی ڈیم سمیت متعدد منی ڈیم ٹوٹنے سے کئی آبادیاں پانی میں ڈوب گئیں۔ مل کھوکھراں، جھنگ کھوکھراں، آئمہ اور بھگوالہ میں برساتی نالوں کا پانی گھروں میں داخل ہواجس سے گھریلوں سامان کو نقصان پہنچا۔ مائر میں دو بارہ تعمیرہونے والی پلی پانی میں بہہ گئی، دونوں دیہاتوں کاآپس سے رابطہ منقطع ہو گیا۔
بودلہ کےمقام پر دینہ شہر سے ملانے والی واحد سڑک بھی پانی بہا کرلے گئی جس سے آمدورفت معطل ہوگئی، متعددبجلی کے پول گرگئے جبکہ مختلف علاقوں میں گھروں کی چھتیں، دیواریں گرنے اور لینڈسلائیڈنگ کے واقعات بھی رونماہوئے۔ پھڈیال اور آڑا بشارت کے درمیان لینڈسلائیڈنگ سے دونوں اضلاع (جہلم اور چکوال) کا آپس سے رابطہ منقطع ہوگیا۔کافی لوگوں کامالی نقصان ہوا۔
ریسکیوٹیمیں نےامدادی کارروائیاں کرتے ہوئے پھڈال، بودلہ، بڑاگراں اور دیگرجگہوں سے متاثرہ لوگوں کو ریسکیوکرکے محفوظ مقام پر منتقل کیا۔ عبداللہ ایلیمنٹری سکول میں پانی داخل ہوگیا، برساتی نالوں میں شدید طغیانی ہے۔ پدھری بڑاگواہ میں چھتیں اور دیواریں گرنے کے زیادہ واقعات رونماہوئے۔
سوہاوہ کے علاقہ بڑاگواہ اور گردونواح میں 144ملی میٹر بارش ہوئی۔ محکمہ موسمیات کے مطابق مزید بارشوں کابھی امکان ہے۔
ریسکیو 1122 کے علاوہ ضلعی انتظامیہ اور کسی سیاسی نمائندے نے متاثرہ علاقوں کا دورہ نہیں کیا۔
