جہلم/ دینہ: ضلع جہلم کے تاریخی مقام قلعہ روہتاس میں 277 کے قریب سکھ یاتریوں کی آمد، گردوارہ چوا صاحب پر حاضری اور مذہبی رسومات ادا کیں، اس سلسلے میں سیکیورٹی کے سخت ترین انتظامات کیے گئے تھے ، سکھ یاتریوں کا بہترین انتظامات کرنے پر حکومت پاکستان کا شکریہ ادا کیا۔
تفصیلات کے مطابق جہلم کی تحصیل دینہ کے تاریخی مقام قلعہ روہتاس میں دوسرے روز بھی بھارت، کینیڈا اور امریکہ سے آئے سکھ یاتریوں کی آمد کا سلسلہ جاری ہے۔ آج 277کے قریب سکھ یاتریوں کا قافلہ قلعہ روہتاس کے پہلو میں واقع گردوارہ چوا صاحب پہنچا جہاں سکھ یاتریوں نے گردوارہ چوا صاحب پر حاضری دی اور مذہبی رسومات ادا کیں، اس سلسلے میں سکیورٹی کے سخت ترین انتظامات کیے گئے تھے۔
سکھ یاتریوں نے اپنی مذہبی رسومات ادا کرنے کے بعد گفتگو کرتے ہوئے بتایا کہ پاکستان ایک پر امن ملک ہے یہاں آ کر بہت اچھا لگا، ہماری عبادت گاہیں محفوظ ہیں یہاں آ کر اپنائیت محسوس ہوئی اور ڈھیروں محبت ملی ہے۔ پاکستان کی محبت کو ہمیشہ یاد رکھا جائے گا۔
انہوں نے کہا کہ پاکستان کا پیار اور محبت اپنی مثال ہے، حکومت کی طرف سے سکھ یاتریوں کے لیے بہترین انتظامات کر کے ہمارے دل جیت لیے ہیں، بھارت کو بھی چاہئے نفرتوں کو ختم کر کے دوستی کا ہاتھ بڑھائے۔
