یورپی ملک پرتگال نے ایک نیا ’سولیڈیریٹی گولڈن ویزا‘ متعارف کرانے کا اعلان کیا ہے جس کا مقصد عوامی مفاد کی خاطر سماجی ہم آہنگی کو فروغ دینا ہے۔
غیرملکی میڈیا کے مطابق، پرتگال کی حکومت کی جانب سے اس منصوبے پر عمل درآمد کی حتمی تاریخ کا ابھی اعلان نہیں کیا گیا۔ اس پروگرام کے تحت متمول غیرملکی افراد کو پرتگال میں سماجی منصوبوں میں کم از کم 250000 یورو کی سرمایہ کاری کرنے پر ملک میں رہائش کی اجازت دی جائے گی۔ ان فنڈز کو انفراسٹرکچر اور وسائل کی بہتری کے لیے خرچ کیا جائے گا تاکہ مخدوش حالات کا سامنا کرنے والے تارکین وطن کے انضمام میں مدد مل سکے۔
لوئس مونٹی نیگرو کی انتظامیہ کے مطابق، اس اقدام کو سماجی سرمایہ کاری کے لیے نجی سرمایہ کو راغب کرنے کے لیے ڈیزائن کیا گیا ہے
سولیڈیریٹی ویزا روایتی گولڈن ویزا سے کیسے مختلف ہے؟
روایتی گولڈن ویزا پروگرام رئیل اسٹیٹ، ثقافتی پیداوار یا ملازمتوں کی تخلیق کے لیے سرمایہ کاری کرنے والے امیر غیر ملکیوں کو رہائش کی اجازت دیتا ہے۔ پرتگال میں ہاؤسنگ کے بحران کے بعد رئیل اسٹیٹ کے آپشن کو اس فہرست سے نکال دیا گیا تھا، جس کے بعد حکومت نے سماجی سرمایہ کاری، ثقافتی فنڈنگ اور سائنسی تحقیق سمیت متبادل شعبوں پر توجہ مرکوز کی وسیع تر سماجی اہداف حاصل کیے جاسکیں۔
نئے گولڈن ویزا کے فوائد
سولیڈیریٹی گولڈن ویزا پرتگال اور اس ملک میں رہائش اختیار کرنے کے خوہشمند درخواست دہندگان دونوں کے مفاد کو مدنظر رکھ کر شروع کیا جارہا ہے۔ یہ ویزا سرمایہ کاروں کو یورپی یونین اور شینگن کے علاقوں میں رہائش اور نقل و حرکت کی آزادی دیتا ہے۔ مزید برآں، ویزا گائیڈ پاسپورٹ انڈیکس کے مطابق، پرتگال کا پاسپورٹ دنیا کے مضبوط ترین پاسپورٹس میں سے ایک ہے، جو 105 ممالک تک بغیر ویزا رسائی اور 43 ممالک کے پاسپورٹ کے بغیر سفر کی اجازت دیتا ہے۔
واضح رہے کہ پرتگال حکومت کا یہ منصوبہ مائیگریشن کے لیے تشکیل کردہ ایکشن پلان کا حصہ ہے جس کا پرتگال کے وزیر صدارت، انتونیو لیٹاؤ امارو نے رواں برس جون میں اعلان کیا تھا۔ اس منصوبے کا مقصد مائیگریشن اور انضمام کی پالیسیوں کو جدید اور اس بات کو یقینی بنانا ہے کہ سولیڈیریٹی ویزے کی مدد سے حاصل ہونے والی سرمایہ کاری ملک کے سماجی اہداف کے حصول میں معاون ثابت ہوگی۔
