جہلم: ڈپٹی کمشنر جہلم میثم عباس نے کالا گوجراں کا دورہ کیا، جہاں انہوں نے زیر تعمیر پارک کے کام کا معائنہ کیا۔ میونسپل کمیٹی کے حکام نے ڈپٹی کمشنر کو پارک کی تعمیر کے حوالے سے تفصیلی بریفنگ دی۔
ڈپٹی کمشنر نے اس موقع پر کہا کہ کالا گوجراں پارک اہل علاقہ کے لیے ایک اہم تفریحی سہولت ہے اور اس کی تعمیر کے لیے 11 کروڑ روپے کی خطیر رقم مختص کی گئی ہے۔ انہوں نے ہدایت کی کہ پارک کی تعمیر کے معیار پر کوئی سمجھوتہ نہیں کیا جائے گا اور کام بروقت مکمل کیا جائے تاکہ لوگوں کو اس سہولت کا فائدہ جلد مل سکے۔
بعد ازاں ڈپٹی کمشنر نے گورنمنٹ گرلز ہائی اسکول کالا گوجراں کا دورہ کیا، جہاں انہوں نے اساتذہ اور طالبات سے ملاقات کرتے ہوئے تعلیمی سرگرمیوں اور کارکردگی کے بارے میں تبادلہ خیال کیا۔ ڈپٹی کمشنر نے اسکول میں صفائی، بنیادی سہولیات اور تعلیمی ماحول کا جائزہ لیتے ہوئے متعلقہ حکام کو سہولیات میں مزید بہتری لانے کی ہدایت کی۔
انہوں نے کہا کہ طلبہ و طالبات کو تعلیم کے ساتھ ساتھ صاف اور محفوظ ماحول فراہم کرنا ہماری ترجیحات میں شامل ہے، اور اس کے لیے ہر ممکن اقدامات کیے جائیں گے۔
