جہلم: چراغ تلے اندھیرا، میونسپل کمیٹی دفتر جہلم کے اردگرد تجاوزات مافیا سرگرم جبکہ ایم سی کے افسران اور شعبہ انکروچمنٹ کی مجرمانہ خاموشی نے شہریوں میں شدید بے چینی پیدا کر دی۔
تفصیلات کے مطابق وزیر اعلیٰ پنجاب مریم نواز شریف کے وژن اور ڈپٹی کمشنر کے احکامات کی روشنی میں جہلم شہر بھر سمیت ضلع کے مختلف علاقوں میں تجاوزات کے خلاف بھرپور آپریشن جاری ہے، مگر حیران کن طور پر خود میونسپل کمیٹی کے دفتر کے اردگرد سڑکوں پر ناجائز تجاوزات قائم ہیں، جنہیں مبینہ طور پر ایم سی کے ذمہ داران کی پشت پناہی حاصل ہے۔ اس صورتحال نے میونسپل کمیٹی کی کارکردگی پر سوالیہ نشان لگا دیا ہے۔
شہریوں کا کہنا ہے کہ تجاوزات کے باعث ٹریفک کی روانی متاثر ہو رہی ہے اور پیدل چلنے والے افراد کو شدید مشکلات کا سامنا ہے مگر متعلقہ حکام کی خاموشی اس بات کا ثبوت ہے کہ یہ سب کچھ ان کی ملی بھگت کے بغیر ممکن نہیں۔
عوامی حلقوں نے وزیراعلیٰ پنجاب مریم نواز شریف، چیف سیکرٹری پنجاب، سیکرٹری بلدیات اور دیگر متعلقہ حکام سے مطالبہ کیا ہے کہ میونسپل کمیٹی کے اردگرد قائم تجاوزات کا فوری خاتمہ کیا جائے اور تجاوزات مافیا کی سرپرستی کرنے والے ذمہ داران کے خلاف سخت محکمانہ کارروائی عمل میں لائی جائے تاکہ قانون کی بالادستی قائم ہو سکے اور شہریوں کو درپیش مسائل کا حل ممکن بنایا جا سکے۔
