جہلم: ڈسٹرکٹ پولیس آفیسر (ڈی پی او) جہلم طارق عزیز سندھو نے کہا ہے کہ اسلحہ کی نمائش اور ہوائی فائرنگ بدترین قانون شکنی ہے، جسے روکنا پولیس کی اولین ذمہ داری ہے۔ سوشل میڈیا پر اسلحہ کی نمائش کرنے والوں کو بھی قانون کے شکنجے میں لایا جائے گا، جبکہ اسلحہ کی نمائش اور ہوائی فائرنگ میں ملوث افراد کے خلاف فوری قانونی کارروائی عمل میں لائی جائے گی۔
یہ احکامات انہوں نے آئی جی پنجاب ڈاکٹر عثمان انور کی ہدایات کی روشنی میں ضلع بھر میں 24/7 پولیسنگ جاری رکھتے ہوئے تمام پولیس افسران کو دیے۔ ڈی پی او طارق عزیز سندھو نے کہا کہ اسلحہ کی نمائش اور ہوائی فائرنگ جیسے غیر قانونی اقدامات جرائم کے آغاز کا سبب بنتے ہیں اور یہ قانون کو براہ راست چیلنج کرنے کے مترادف ہیں۔ ایسے عناصر کے خلاف سخت کارروائی عمل میں لائی جائے گی تاکہ عوام کے جان و مال کا تحفظ اور معاشرتی امن یقینی بنایا جا سکے۔
انہوں نے ہدایت کی کہ ضلع بھر کے تمام ایس ڈی پی اوز اس بات کو یقینی بنائیں کہ ان کے علاقوں میں اسلحہ کی نمائش اور ہوائی فائرنگ جیسے واقعات نہ ہوں۔ مزید برآں اگر کسی تھانے کی حدود میں اسلحہ کی نمائش یا ہوائی فائرنگ کا واقعہ رپورٹ ہوا تو متعلقہ ایس ایچ او کے خلاف سخت محکمانہ کارروائی کی جائے گی۔
ڈی پی او طارق عزیز سندھو نے اتوار کے روز ضلع بھر میں مسیحی برادری کی عبادت گاہوں کی سیکیورٹی کا بھی جائزہ لیا اور سیکیورٹی پر مامور اہلکاروں کو ہدایت کی کہ ان کا سرکاری اسلحہ مکمل طور پر فعال اور تیار حالت میں ہونا چاہیے تاکہ کسی بھی ناخوشگوار واقعے سے بروقت نمٹا جا سکے۔
