جہلم: ڈپٹی کمشنر جہلم میثم عباس نے کہا کہ ضلع جہلم میں رمضان المبارک کے دوران دو سہولت بازار لگائے جائیں گے، جہاں شہریوں کو روزمرہ کی اشیائے خور و نوش سستے داموں دستیاب ہوں گی۔ یہ سہولت بازار پنجاب حکومت کے احکامات پر قائم کیے جا رہے ہیں تاکہ عوام کو مہنگائی سے ریلیف فراہم کیا جا سکے۔
ڈپٹی کمشنر جہلم میثم عباس نے رمضان سہولت بازاروں کے قیام کے حوالے سے تیاریوں کا جائزہ لینے کے لیے منعقدہ اجلاس میں گفتگو کرتے ہوئے کہا کہ ضلع جہلم میں دو سہولت بازار، ایک جہلم اور دوسرا سوہاوہ میں لگایا جائے گا، جہاں روزمرہ کی کھانے پینے کی تمام اشیاء رعایتی نرخوں پر دستیاب ہوں گی۔ اس سلسلے میں انتظامات کو حتمی شکل دی جا رہی ہے۔
میثم عباس نے مزید کہا کہ پنجاب حکومت شہریوں کو ریلیف فراہم کرنے کے لیے خصوصاً رمضان المبارک کے مہینے میں سستی اشیاء کی دستیابی کو یقینی بنانے کے لیے کوشاں ہے۔ اس لیے سہولت بازاروں میں بہترین انتظامات کیے جائیں گے تاکہ شہری رمضان کے مقدس مہینے میں کھانے پینے کی اشیاء مناسب قیمتوں پر حاصل کر سکیں۔
اس موقع پر ایڈیشنل ڈپٹی کمشنر جہلم صبا سحر اور اسسٹنٹ کمشنر سوہاوہ نے جہلم اور سوہاوہ میں سہولت بازاروں کے مقامات اور انتظامات کے حوالے سے ڈپٹی کمشنر جہلم کو بریفنگ دی۔
