پیرو کا ایک ماہی گیر 94 دن تک سمندر کی خوفناک لہروں کے درمیان ایک کشتی میں پھنسا رہا جسے حال ہی میں ریسکیو کرنے کے بعد ہسپتال سے فارغ کیا گیا۔
غیر ملکی میڈیا کے مطابق گزشتہ دنوں ایکواڈور کے نیوی حکام کو سمندر میں ایک چھوٹی کشتی ڈولتی دکھائی دی اور جب وہ اس کے قریب پہنچے تو کشتی میں سوار شخص کو بہت تشویشناک حالت میں پایا۔
رپورٹ کے مطابق 61 سالہ میکسیمو ناپا کو منگل کے روز اس کی چھوٹی مچھلی پکڑنے والی کشتی سے ریسکیو کیا گیا۔ اسے ایکواڈور کے ایک جہاز نے پیرو کے چمبوٹے کے ساحل پر پایا۔
خستہ حالت میں ملنے والا یہ شخص تین ماہ قبل مچھلیوں کے شکار کے لیے ایک چھوٹی کشتی میں سمندر میں نکلا تھا تاہم تند وتیز لہریں کشتی کو بہا کر ساحل سے دور گہرے سمندر میں لے گئیں۔
ناپا نے مقامی میڈیا کو اشکبار ہوتے ہوئے انٹرویو میں بتایا کہ اس نے سمندر میں کاکروچ، پرندے اور کچھوے کھا کر گزازا کیا جس کی وجہ سے وہ زندہ رہا۔
ناپا نے کہا کہ اس نے اپنے خاندان، خاص طور پر اپنی ماں اور اپنی دو ماہ کی پوتی کے بارے میں سوچ کر خود کو زندہ رکھا۔ وہ ہار نہیں ماننا چاہتا تھا۔
نیوی حکام نے اس کو فوری ریسکیو کیا اور علاج کے لیے اسپتال منتقل کیا ابتدا میں اس کی حالت انتہائی خراب تھی تاہم اب طبیعت میں مسلسل بہتری آ رہی ہے۔
بحریہ کے کیپٹن جارج گونزالیز کے مطابق میکسیمو ناپا کو جب ریسکیو کیا گیا تو حیران کن طور پر وہ اچھی جسمانی صحت میں تھا۔ صدمے کے باوجود وہ چل پھر سکتا ہے اور خود کو سنبھالنے کی حالت میں ہے۔
