پنڈدادنخان: کانسٹیبل محمد رمضان شہید (ساکن ڈھڈی تھل، تحصیل پنڈدادنخان، ضلع جہلم) کی اکتیسویں برسی کے موقع پر پنڈدادنخان میں ایک پروقار تقریب کا انعقاد کیا گیا۔
ڈی پی او جہلم طارق عزیز سندھو کی ہدایت پر ڈی ایس پی پنڈدادنخان، ایس ایچ او اور دیگر پولیس افسران نے شہید کی لحد پر حاضری دی، پھولوں کی چادر چڑھائی اور فاتحہ خوانی کی۔ تقریب کے دوران پولیس کے چاق و چوبند دستے نے شہید کانسٹیبل محمد رمضان کو سلامی پیش کی۔ اس موقع پر شہید کی خدمات کو خراج تحسین پیش کرتے ہوئے ان کی قربانی کو سراہا گیا۔
کانسٹیبل محمد رمضان سال 1994 میں پنڈدادنخان میں تعینات تھے۔ ڈکیتی کی اطلاع پر فوری طور پر موقع پر پہنچے، جہاں مسلح ڈاکوؤں کی اندھا دھند فائرنگ سے وہ شدید زخمی ہو گئے اور جام شہادت نوش کیا۔ ہر سال 28 اپریل کو ان کی قربانی کی یاد میں برسی منائی جاتی ہے تاکہ عوام کے تحفظ کے لیے اپنی جان نچھاور کرنے والے اس عظیم سپاہی کو خراج عقیدت پیش کیا جا سکے۔
ڈی پی او جہلم طارق عزیز سندھو نے اس موقع پر کہا کہ ’’شہداء پولیس کی قربانیاں لازوال ہیں، انہی کے خون سے ہمارے قومی پرچم کا رنگ گہرا سبز ہے۔ آج کا دن تجدید عہد وفا کا دن ہے کہ ہم عوام الناس کی جان و مال کی حفاظت کے لیے کسی قربانی سے دریغ نہیں کریں گے۔‘‘
انہوں نے مزید کہا کہ ’’جہلم پولیس شہداء کی وارث جماعت ہے۔ ہم اپنے شہیدوں کے لہو کو کبھی فراموش نہیں کریں گے۔ شہداء پولیس کے خاندان ہماری ذمہ داری ہیں، ان کی دیکھ بھال اور ان کے مسائل کا حل ہماری اولین ترجیح اور جہلم پولیس پر قرض ہے۔‘‘ شہید کانسٹیبل محمد رمضان کی قربانی کو ہمیشہ یاد رکھا جائے گا اور ان کے خاندان کے ساتھ مکمل تعاون کا سلسلہ جاری رہے گا۔
