جہلم شہر اور ضلع بھر میں قصابوں نے سرکاری نرخوں کی دھجیاں اڑا دی ہیں اور اپنی دکانوں پر سرکاری نرخ نامے آویزاں کرنے کے باوجود گوشت مرضی کے نرخوں پر فروخت کر رہے ہیں۔
شہریوں کی شکایات کے مطابق جب کوئی خریدار سرکاری نرخوں پر گوشت دینے کا مطالبہ کرتا ہے تو اکثر قصاب اس سے تکرار اور بدتمیزی پر اتر آتے ہیں، جس کی وجہ سے عوام کو مجبورا مہنگے داموں گوشت خریدنے پر مجبور ہونا پڑتا ہے۔
ذرائع کے مطابق بعض قصاب پانی کے زیادہ پریشر والا گوشت بھی فروخت کر رہے ہیں جس سے گوشت کا معیار متاثر ہو رہا ہے۔
عوامی فلاحی تنظیموں اور شہریوں نے اس صورتحال پر شدید تشویش کا اظہار کرتے ہوئے اربابِ اختیار سے فوری نوٹس لینے اور ضلع بھر میں ایسے قصابوں کے خلاف سخت کارروائی کا مطالبہ کیا ہے جو حکومتی احکامات کی خلاف ورزی کرتے ہوئے اپنی مرضی کے نرخ وصول کر رہے ہیں اور سرکاری رٹ کا مذاق اڑا رہے ہیں۔
شہریوں نے متعلقہ حکام سے اپیل کی ہے کہ روزانہ کی بنیاد پر دکانوں کی نگرانی کی جائے اور سرکاری نرخوں کی خلاف ورزی کرنے والوں کے خلاف سخت قانونی کارروائی عمل میں لائی جائے تاکہ عام آدمی کو ریلیف فراہم کیا جا سکے۔
