جہلم: پاکستان مسلم لیگ ن کے ضلعی سیکرٹریٹ مشین محلہ جہلم سے پاک فوج کے ساتھ اظہارِ یکجہتی کے لیے ایک شاندار ریلی نکالی گئی۔
ریلی کی قیادت صدر مسلم لیگ ن حافظ اعجاز جنجوعہ نے کی۔ ریلی مشین محلہ سے شروع ہو کر اقبال لائبریری روڈ اور سول لائن سے ہوتی ہوئی جہلم پریس کلب پر اختتام پذیر ہوئی۔
ریلی میں شرکاء نے مسلم لیگ ن کے جھنڈے، بینرز اور پلے کارڈز اٹھا رکھے تھے جن پر "پاکستان زندہ باد” اور "پاک فوج زندہ باد” جیسے جذباتی نعرے درج تھے۔ پورا ماحول حب الوطنی اور افواجِ پاکستان سے عقیدت کے نعروں سے گونجتا رہا۔
ریلی سے خطاب کرتے ہوئے حافظ اعجاز جنجوعہ نے کہا کہ "جہلم کا کوئی ایسا قبرستان نہیں جہاں پاک فوج کے شہداء مدفون نہ ہوں۔ ہم اپنے عظیم شہداء کو سلام پیش کرتے ہیں اور پوری قوم پاک فوج کے ساتھ کندھے سے کندھا ملا کر کھڑی ہے۔”
انہوں نے مزید کہا کہ پریس کلب جہلم کے صحافی، خواہ الیکٹرانک میڈیا سے ہوں یا پرنٹ میڈیا سے، انتہائی ذمہ داری سے اپنے فرائض انجام دے رہے ہیں جس پر وہ مبارکباد کے مستحق ہیں۔
ریلی میں ضلعی و صوبائی تنظیموں کے رہنماؤں، سابقہ ممبرانِ ڈسٹرکٹ کونسل اور شہریوں کی بڑی تعداد نے شرکت کی اور پاک فوج سے بھرپور محبت اور حمایت کا اظہار کیا۔
