جہلم: جنسی زیادتی کے مقدمہ کا فیصلہ، عدالت نے مجرم محمد اکرم کو 10 سال قید اور 2 لاکھ روپے جرمانے کی سزا سنا دی۔
تفصیلات کے مطابق جہلم میں عدالت نے تھانہ چوٹالہ میں درج جنسی زیادتی کے سنگین مقدمہ نمبر 230/23 بجرم 375A / 367A کا فیصلہ سنا دیا۔ عدالت نے جرم ثابت ہونے پر مجرم محمد اکرم کو 10 سال قید بامشقت اور 2 لاکھ روپے جرمانہ کی سزا سنائی ہے۔
مجرم نے ایک نوجوان لڑکے کو جنسی زیادتی کا نشانہ بنا کر قانون کی سنگین خلاف ورزی کی تھی۔ واقعہ کے بعد جہلم پولیس نے فوری کارروائی کرتے ہوئے مقدمہ درج کیا، مجرم کو ٹریس کر کے گرفتار کیا گیا، اور پختہ شواہد کے ساتھ چالان عدالت میں پیش کیا گیا۔
جہلم پولیس کی انوسٹیگیشن اور لیگل ٹیموں نے مقدمہ کی بھرپور اور موثر پیروی کی، جس کے نتیجے میں معزز عدالت نے مجرم کو قرار واقعی سزا سناتے ہوئے انصاف کے تقاضے پورے کیے۔
ڈسٹرکٹ پولیس آفیسر جہلم طارق عزیز سندھو نے کہا ہے کہ بچوں اور خواتین کے ساتھ جنسی زیادتی جیسے سنگین جرائم پر زیرو ٹالرنس پالیسی پر سختی سے عمل کیا جا رہا ہے۔ ایسے جرائم میں ملوث افراد کسی قسم کی رعایت کے مستحق نہیں۔
ڈی پی او جہلم نے کیس میں بہترین تفتیش اور قانونی معاونت پر انوسٹیگیشن ٹیم اور لیگل ٹیم کو شاباش دیتے ہوئے تعریفی اسناد اور نقد انعام دینے کا اعلان بھی کیا۔
