جہلم پولیس کی عوام دوست پالیسی کے تحت بچھڑوں کو اپنوں سے ملوانے کی روایت برقرار، گمشدہ صیام ولد علی شان، سیف اللہ اور بزرگ شہری غلام رسول کو تلاش کر کے ورثاء کے حوالے کر دیا۔
تفصیلات کے مطابق پولیس تھانہ سٹی کی رمضان المبارک کے دوران تعینات پکٹ کے عملہ نے دینہ سے فیملی کے ہمراہ شاپنگ کے لئے آنے والے 6 سالہ محمد صیام ولد علی شان کو ڈھونڈ کر لواحقین کے حوالے کر دیا۔
سیف اللہ جو والدین سے ناراض ہو کر گھر سے نکل گیا تھا، جس کے ورثاء نے پولیس کو گمشدگی کی اطلاع دی جس پر سوہاوہ پولیس نے کارروائی کرتے ہوئے لڑکے کو ڈھونڈ کر ورثاء کے حوالے کر دیا۔
پولیس خدمت کاؤنٹر سول ہسپتال جہلم کے عملہ نے 78 سالہ غلام رسول نامی بزرگ جو کہ سرائے عالمگیر سے لا پتہ ہوگئے تھے کے لواحقین کو تلاش کر کے بزرگ شہری کو گھروالوں کےحوالے کر دیا۔
گمشدگان کے لواحقین نے جہلم پولیس کا تہہ دل سے شکریہ ادا کرتے ہوئے متعلقہ افسران کو ڈھیروں دعائیں دیں۔
ڈی پی او جہلم ناصر محمود باجوہ نے کہا کہ شہری عید خریداری کے ایام میں بازاروں اور رش والی جگہوں پر اپنے بچوں کے حوالے سے محتاط رہیں۔
