جہلم: ڈپٹی کمشنر جہلم میثم عباس نے موسمِ برسات کے پیش نظر تعلیمی اداروں کی عمارتوں کا جائزہ لینے کے لیے گورنمنٹ گرلز ہائی اسکول سول لائن اور گورنمنٹ الطاف اسکول کا دورہ کیا۔ اس موقع پر انہوں نے اسکول کی عمارتوں کی حالت، نکاسی آب کے نظام اور سمر کیمپ کی سرگرمیوں کا تفصیلی جائزہ لیا۔
تفصیلات کے مطابق ڈپٹی کمشنر نے اسکول پرنسپلز اور اساتذہ سے ملاقات کی اور جاری تعلیمی و انتظامی معاملات پر بریفنگ لی۔ انہوں نے اسکول انتظامیہ کو ہدایت کی کہ مون سون کے دوران بارش کے پانی کے نکاس کے لیے مؤثر اور دیرپا انتظامات کیے جائیں تاکہ تعلیمی سرگرمیوں میں خلل نہ آئے اور عمارتوں کو ممکنہ نقصان سے بچایا جا سکے۔
ڈی سی میثم عباس نے سمر کیمپ کے حوالے سے بھی احکامات جاری کرتے ہوئے کہا کہ چھٹیوں میں تعلیمی اداروں میں جاری سمر کیمپ طلباء کے لیے بہترین موقع ہیں، اس لیے اساتذہ کی ذمہ داری ہے کہ وہ طلباء کو معیاری تعلیم فراہم کریں اور ان کے وقت کو مؤثر طریقے سے استعمال میں لائیں۔
انہوں نے اسکولوں میں صفائی ستھرائی، ماحول کی بہتری اور دیگر سہولیات کے حوالے سے بھی احکامات دیے اور یقین دہانی کرائی کہ ضلعی انتظامیہ تعلیمی اداروں کو درپیش مسائل کے حل کے لیے ہر ممکن تعاون فراہم کرے گی۔
