الفلاح فاؤنڈیشن پاکستان کے زیر اہتمام 13 جولائی کو ایک فری میڈیکل کیمپ کا انعقاد کیا گیا، جو دن 11 بجے سے 1 بجے تک جاری رہا۔
یہ کیمپ ببوٹ شرقی کے مقام پر لگایا گیا، جس کا مقصد علاقے کے ضرورت مند اور سفید پوش طبقے کو صحت کی مفت اور معیاری سہولیات فراہم کرنا تھا۔ آج کے کیمپ میں ماہرینِ اطفال (چائلڈ اسپیشلسٹ) اور ماہرینِ امراضِ جلد (سکن اسپیشلسٹ) پر مشتمل ڈاکٹروں کی ٹیم نے مریضوں کا معائنہ کیا، مکمل توجہ کے ساتھ طبی مشورے دیے اور تمام مریضوں کو مفت ادویات بھی فراہم کی گئیں۔
الفلاح فاؤنڈیشن پاکستان سلسلہ نقشبندیہ اویسیہ کی ذیلی تنظیم ہے جو اپنی تمام فلاحی خدمات شیخِ سلسلہ نقشبندیہ اویسیہ امیر عبدالقدیر اعوان کی زیر نگرانی انجام دے رہی ہے۔
کیمپ کا دورہ صاحبِ مجاز لطیف بٹ اویسی صاحب نے بھی کیا، جنہوں نے طبی عملے اور منتظمین کے انتظامات پر اطمینان کا اظہار کیا اور اسے ایک فلاحی خدمت کا بہترین نمونہ قرار دیا۔
اس موقع پر الفلاح فاؤنڈیشن کے نمائندوں نے کہا کہ ان کا مقصد صرف جسمانی علاج نہیں بلکہ انسانیت کی خدمت اور محروم طبقات تک سہولیات پہنچانا ہے۔ فاؤنڈیشن بلا کسی سیاسی یا مذہبی تفریق کے ملک بھر میں اپنی خدمات انجام دے رہی ہے۔ اس تنظیم کی بنیاد حضرت امیر محمد اکرم اعوانؒ نے رکھی تھی، جبکہ اس کی موجودہ سرپرستی امیر عبدالقدیر اعوان کر رہے ہیں۔
مریضوں اور ان کے لواحقین نے الفلاح فاؤنڈیشن پاکستان اور شیخ سلسلہ نقشبندیہ اویسیہ کا تہہ دل سے شکریہ ادا کیا اور ان کے لیے نیک تمناؤں اور دعاؤں کا اظہار کیا۔ کیمپ کے اختتام پر فاؤنڈیشن کے ذمہ داران نے اس عزم کا اظہار کیا کہ اسی جذبے اور نیک نیتی سے مستقبل میں بھی ملک بھر میں فری میڈیکل کیمپس کا سلسلہ جاری رکھا جائے گا۔
