جہلم: ضلع جہلم کے تاجروں اور دکانداروں نے پیٹرولیم مصنوعات کی قیمتوں میں مسلسل اضافے پر شدید تشویش کا اظہار کرتے ہوئے کہا ہے کہ ایندھن مہنگا ہونے سے اشیائے ضروریہ کی ترسیل اور کاروباری اخراجات میں اضافہ ہو جاتا ہے، جس کے اثرات بالآخر صارفین تک منتقل ہوتے ہیں۔
میڈیا نمائندگان سے گفتگو کرتے ہوئے تاجروں کا کہنا تھا کہ پیٹرولیم مصنوعات کی قیمتوں میں اضافے کے بعد آٹا، گھی، دالیں، سبزیاں، چینی، دودھ، روٹی اور دیگر اشیائے خورونوش کی خرید و فروخت کے اخراجات بڑھ جاتے ہیں، جس کے باعث متعدد اشیاء کی قیمتوں میں اضافہ کرنا ان کے لیے ناگزیر ہو جاتا ہے۔
دکانداروں کے مطابق سفید پوش اور متوسط طبقہ پہلے ہی مہنگائی، بے روزگاری اور محدود آمدنی کے باعث مالی مشکلات کا شکار ہے، جبکہ پیٹرولیم مصنوعات کی قیمتوں میں بار بار ہونے والے اضافے نے گھریلو بجٹ پر مزید دباؤ ڈال دیا ہے۔ ان کا کہنا تھا کہ ایندھن مہنگا ہونے سے نقل و حمل، سپلائی چین اور دیگر کاروباری اخراجات بڑھتے ہیں، جس کے اثرات تقریباً ہر شعبے پر مرتب ہوتے ہیں۔
تاجروں نے مطالبہ کیا کہ حکومت مہنگائی پر قابو پانے، کاروباری لاگت کم کرنے اور عوام کو ریلیف فراہم کرنے کے لیے موثر اور دیرپا اقدامات کرے تاکہ ضروری اشیاء کی قیمتوں میں استحکام لایا جا سکے اور عام شہریوں کو مزید مالی مشکلات کا سامنا نہ کرنا پڑے۔
