جہلم: پولیس نے ایک شہری کی درخواست پر کارروائی کرتے ہوئے مبینہ طور پر راہگیروں کو نقصان پہنچانے والے کتے کے مالک کے خلاف مقدمہ درج کر کے اسے گرفتار کر لیا۔
ترجمان جہلم پولیس کے مطابق جہلم میں تھانہ چوٹالہ کو موصول ہونے والی درخواست میں موقف اختیار کیا گیا کہ ملزم کا کتا متعدد راہگیروں پر حملہ کر چکا ہے اور حال ہی میں اس نے ایک 10 سالہ بچے کو کاٹ کر زخمی کر دیا، جس کے باعث علاقے میں خوف و ہراس کی فضا پائی جا رہی ہے۔
درخواست گزار کے مطابق کتے کے مالک کو کئی مرتبہ کتے کو قابو میں رکھنے اور مناسب حفاظتی اقدامات کرنے کے لیے کہا گیا، تاہم اس جانب مبینہ طور پر توجہ نہیں دی گئی، جس کے نتیجے میں شہریوں کی جان و مال کو خطرات لاحق رہے۔
درخواست موصول ہونے پر ایس ایچ او تھانہ چوٹالہ نے اپنی ٹیم کے ہمراہ فوری کارروائی کرتے ہوئے مقدمہ درج کیا اور کتے کے مالک کو گرفتار کر لیا۔ پولیس کا کہنا ہے کہ مقدمے کی تفتیش قانون کے مطابق جاری ہے اور تمام پہلوؤں کا جائزہ لیا جا رہا ہے۔
ڈسٹرکٹ پولیس آفیسر (ڈی پی او) شفیق احمد چوہدری نے کہا کہ شہریوں کی جان و مال کے تحفظ میں غفلت یا لاپرواہی کسی صورت برداشت نہیں کی جائے گی۔ انہوں نے کہا کہ عوامی شکایات پر فوری، شفاف اور بلاامتیاز قانونی کارروائی کو یقینی بنایا جا رہا ہے تاکہ شہری خود کو محفوظ محسوس کریں۔
