پنڈ دادنخان: شہید کانسٹیبل محمد فیاض کی گیارویں برسی عقیدت و احترام سے منائی گئی۔ ڈی پی او جہلم طارق عزیز سندھو کے احکامات پر ڈی ایس پی پنڈ دادنخان محمد اکرم نے شہید کی لحد پر پھول چڑھائے اور ان کے درجات کی بلندی کے لیے دعا کی۔
اس موقع پر پولیس کے چاق و چوبند دستے نے شہید کو سلامی پیش کی، جبکہ انچارج چوکی سٹی پنڈ دادنخان اور دیگر پولیس افسران بھی تقریب میں شریک ہوئے۔
یاد رہے کہ شہید کانسٹیبل محمد فیاض سال 2014 میں پاکستان عوامی تحریک کے مسلح کارکنوں کے حملے سے اپنے ساتھیوں کو بچاتے ہوئے جامِ شہادت نوش کر گئے تھے۔
تقریب کے دوران ڈی ایس پی پنڈ دادنخان نے شہید کے اہلخانہ سے ملاقات کی اور تحائف پیش کیے۔ اس موقع پر ڈی پی او جہلم طارق عزیز سندھو نے کہا کہ شہداء پولیس ہمارے ماتھے کا جھومر ہیں، جن کی عظیم قربانیاں ناقابلِ فراموش ہیں۔ انہوں نے مزید کہا کہ شہداء کی فیملیز اور ان کے بچے مجھے اپنی فیملی اور بچوں کی طرح عزیز ہیں۔
