جہلم: ڈسٹرکٹ پولیس آفیسر طارق عزیز سندھو نے ڈی پی او آفس جہلم میں سیکیورٹی سٹاف کے ساتھ ایک اہم اجلاس کی صدارت کی۔ میٹنگ میں انچارج سیکیورٹی برانچ سمیت ضلع بھر کے سیکیورٹی سٹاف نے شرکت کی۔
اجلاس کا مقصد ضلع جہلم میں امن و امان کی مجموعی صورتحال، سیکیورٹی انتظامات اور موجودہ چیلنجز کا تفصیلی جائزہ لینا تھا۔
ڈی پی او جہلم نے واضح ہدایات جاری کرتے ہوئے کہا کہ سکیورٹی کے معاملے میں کسی قسم کا کمپرومائز نہیں کیا جائے گا اور ضلع بھر میں زیرو ٹالرنس پالیسی پر سختی سے عملدرآمد یقینی بنایا جائے گا۔ انہوں نے کہا کہ غیر ملکی باشندوں، اقلیتوں، سرکاری و نجی املاک کی سیکیورٹی ہر صورت یقینی بنائی جائے۔
اجلاس میں جمعہ ڈیوٹی، سنڈے سروسز اور دیگر مذہبی عبادات کے دوران فول پروف سکیورٹی انتظامات کو لازمی قرار دیا گیا۔ ڈی پی او نے ہدایت کی کہ اپنے اپنے علاقوں کے کرائم ہاٹ اسپاٹس کی نشاندہی کرتے ہوئے مؤثر گشت اور ناکہ بندی کو مزید بہتر بنایا جائے۔
طارق عزیز سندھو کا کہنا تھا کہ سیکیورٹی سٹاف محکمہ پولیس میں ریڑھ کی ہڈی کی حیثیت رکھتا ہے، اس لیے تمام اہلکار اپنے فرائض پوری مستعدی سے انجام دیں۔ انہوں نے اشتہاری مجرمان، چوروں اور ڈکیت گینگز کے خلاف جاری کریک ڈاؤن کو مزید مؤثر بنانے کی ہدایت بھی کی۔
ڈی پی او جہلم نے مزید کہا کہ دہشت گردوں اور مذہبی منافرت پھیلانے والوں پر کڑی نظر رکھی جائے اور کسی بھی نفرت انگیز یا شرانگیز عنصر کو یہ موقع نہ دیا جائے کہ وہ ضلع جہلم کے پرامن ماحول کو خراب کر سکے۔ اجلاس کے اختتام پر سیکیورٹی سٹاف کو ہدایات پر فوری اور مؤثر عملدرآمد کی تاکید کی گئی۔
