جہلم: لاہور قلندرز کے پلیئرز ڈویلپمنٹ پروگرام کے تحت جہلم میں منعقدہ ٹرائلز کے بعد 14 خوش قسمت کھلاڑیوں کو منتخب کرلیا گیا، جن میں 11 لڑکے اور 3 لڑکیاں شامل ہیں۔
منتخب کھلاڑیوں اور ان کے والدین، بہن بھائیوں اور دوستوں کی خوشی دیدنی تھی، دعاؤں اور محنت نے ان کے خواب کو حقیقت میں بدل دیا۔
جہلم میں ہونے والے ٹرائلز میں نوجوان کھلاڑیوں کی کثیر تعداد نے شرکت کی۔ بہترین کارکردگی کی بنیاد پر منتخب ہونے والے لڑکوں میں محمد حسن، حسیب عمران، محمد اجمل، رضا المصطفیٰ، فیض مغل، طعیب حسین، عبداللہ امین، زیشان علی، اویس اقبال، محمد نعیم اور محمد احسن شامل ہیں۔
اسی طرح لڑکیوں میں عبیرہ معروف، نعلین فاطمہ اور صوبیہ اسماء نے اپنی شاندار صلاحیتوں کے ذریعے جگہ بنائی ہے۔
لاہور قلندرز کے حکام کے مطابق پلیئرز ڈویلپمنٹ پروگرام کا مقصد ملک کے کونے کونے سے باصلاحیت نوجوان کھلاڑیوں کو تلاش کرکے انہیں لاہور قلندرز ہائی پرفارمنس سینٹر میں عالمی معیار کی تربیت دینا ہے تاکہ پاکستان کو مستقبل کے بہترین کرکٹرز فراہم کیے جا سکیں۔
بخدمت جناب وزیرِ اعظم اسلامی جمہوریہ پاکستان
اسلام آباد
موضوع: گاؤں سمبلی سرولہ (تحصیل سوہاوہ، ضلع جہلم) کی ٹوٹی ہوئی سڑک کی فوری تعمیر کے لیے درخواست
محترم جناب وزیرِ اعظم صاحب،
السلام علیکم
میں بطور ایک باشعور شہری اور نمائندہ گاؤں سمبلی سرولہ، آپ کی خدمت میں ایک اہم مسئلے پر توجہ دلانا چاہتا ہوں۔ ہمارا گاؤں تحصیل سوہاوہ، ضلع جہلم میں واقع ہے اور یہاں کی مرکزی سڑک، جو تقریباً 2 سے 3 کلومیٹر طویل ہے، مکمل طور پر تباہ حال ہے۔
جناب والا، ہمارے گاؤں میں 400 سے زائد گھر ہیں۔ اتنی بڑی آبادی کے باوجود ہماری سڑک عرصہ دراز سے ٹوٹ پھوٹ کا شکار ہے۔
عوام کو درپیش مسائل:
اسکول، کالج اور دفاتر جانے والے افراد کو شدید مشکلات
مریض اسپتال تک نہیں پہنچ پاتے
بارشوں میں سڑک کیچڑ کا منظر پیش کرتی ہے
گاڑیاں کرایہ پورا لیتی ہیں، مگر گاؤں تک آنے سے انکار کر دیتی ہیں
ہم نے مقامی نمائندوں کو کئی بار اس مسئلے سے آگاہ کیا، مگر صرف وعدے ملے، کوئی عملی اقدام نہ اُٹھایا گیا۔
جناب وزیرِ اعظم! ہم آپ سے سوال کرتے ہیں:
کیا ہمارا گاؤں پاکستان کا حصہ نہیں؟ کیا ہمارے ووٹ صرف الیکشن کے دنوں میں اہم ہوتے ہیں؟ کیا بنیادی سہولیات تک رسائی صرف شہروں کے عوام کا حق ہے؟
ہم گاؤں سمبلی سرولہ کے عوام آپ سے اپیل کرتے ہیں کہ ہماری سڑک کی تعمیر کے لیے فوری احکامات جاری کیے جائیں تاکہ ہمیں روزانہ کی تکلیف سے نجات ملے۔
خدارا، ہمیں لاوارث نہ چھوڑا جائے۔
والسلام
باشندگانِ گاؤں سمبلی سرولہ
تحصیل سوہاوہ، ضلع جہلم