جہلم پولیس نے ضلع بھر میں دہشت گردوں، جرائم پیشہ عناصر اور سماج دشمن افراد کی سرکوبی کے لیے ایک بڑے پیمانے پر سپیشل سرچ آپریشنز اور ناکہ بندی کا انعقاد کیا۔
پولیس کے مطابق ضلع بھر میں 14 مختلف مقامات پر سرچ آپریشنز کیے گئے اور 399 افراد کی پولیس ایپلیکیشن کے ذریعے ویری فکیشن کی گئی۔
شہر کے داخلی و خارجی راستوں پر سپیشل ناکہ بندی کے ساتھ چیکنگ کی گئی تاکہ مجرمان اشتہاری، جرائم پیشہ افراد اور دیگر سماج دشمن عناصر کی گرفتاری کو ممکن بنایا جا سکے۔
سرچ آپریشنز کا بنیادی مقصد غیر قانونی اسلحہ، منشیات کی برآمدگی، سماج دشمن عناصر کی سرکوبی اور شرپسندوں کو ان کے مذموم عزائم پر عمل پیرا ہونے سے روکنا تھا۔
ڈی پی او جہلم طارق عزیز سندھو نے اس سلسلے میں بتایا کہ یہ اقدامات ضلع میں امن و امان قائم رکھنے اور شہریوں کی حفاظت یقینی بنانے کے لیے کیے جا رہے ہیں۔ انہوں نے مزید کہا کہ پولیس اپنی تمام تر وسائل بروئے کار لا کر عوامی تحفظ کے لیے فعال رہے گی۔
