دینہ: تھانہ دینہ پولیس کا منشیات فروشوں اور شراب فروشوں کے خلاف کریک ڈاؤن جاری ہے۔ ایس ایچ او تھانہ دینہ اور ان کی ٹیم نے دو مختلف کارروائیوں میں اہم کامیابیاں حاصل کرتے ہوئے دو ملزمان کو گرفتار کر کے ان کے قبضے سے بھاری مقدار میں نشہ آور مواد برآمد کیا۔
پہلی کارروائی میں پولیس نے شراب کی سپلائی میں ملوث ملزم دانیال آفتاب کو گرفتار کیا، جس کے قبضے سے 20 لیٹر شراب برآمد کی گئی۔ پولیس نے ملزم کے خلاف تھانہ دینہ میں مقدمہ درج کر کے مزید تفتیش شروع کر دی ہے۔
دوسری بڑی کارروائی میں تھانہ دینہ پولیس نے منشیات فروش لطیف کو دھر لیا، جس کے قبضے سے 1 کلو 60 گرام ہیروئن برآمد ہوئی۔ اس کے خلاف انسداد منشیات ایکٹ کے تحت مقدمہ درج کر کے قانونی کارروائی کا آغاز کر دیا گیا ہے۔
ڈی پی او جہلم طارق عزیز سندھو نے پولیس ٹیم کو کامیاب کارروائیوں پر سراہتے ہوئے کہا کہ "منشیات فروش اور نشہ آور اشیاء فروخت کرنے والے معاشرے کے ناسور ہیں، جن کے خلاف پولیس کا بھرپور کریک ڈاؤن جاری ہے۔ عوام کی حفاظت اور نوجوان نسل کو تباہی سے بچانے کے لیے جہلم پولیس اپنی کوششیں جاری رکھے گی۔”
انہوں نے مزید کہا کہ جرائم پیشہ افراد کو قانون کے کٹہرے میں لایا جائے گا اور ضلع کو منشیات سے پاک کرنے کے لیے تمام ممکنہ اقدامات کیے جا رہے ہیں۔
