ٹورنٹو: شیخِ سلسلہ نقشبندیہ اویسیہ امیر عبدالقدیر اعوان کینیڈا کے شہر ٹورنٹو پہنچ گئے، جہاں سالکین نے ٹورنٹو ایئرپورٹ پر پھولوں کے گلدستوں سے اُن کا پرجوش استقبال کیا۔
میڈیا سے گفتگو کرتے ہوئے امیر عبدالقدیر اعوان نے کہا کہ یہ اُن کا سالانہ دورہ ہے جس کے دوران مختلف روحانی اور تربیتی پروگرامز کا انعقاد کیا جائے گا۔
اُنہوں نے کہا کہ اُن کی کوشش ہوتی ہے کہ لوگوں کو اللہ اللہ سکھائی جائے، کیفیاتِ قلبی اور شعبۂ تصوف پر بات کی جائے، اور افراد کی ایسی تربیت کی جائے جو نہ صرف مسلمانوں بلکہ پوری انسانیت کی بہتری کے لیے مؤثر کردار ادا کرے۔
امیر عبدالقدیر اعوان نے مزید کہا کہ اگر مسلمان اپنی کمزوریوں پر قابو پا لیں تو اپنے حقوق کا دفاع یقینی بنا سکتے ہیں۔ دنیا کی تاریخ گواہ ہے کہ جو کمزور ہوتا ہے، مشکلات بھی اسی کے حصے میں آتی ہیں۔ ہمیں اپنی انفرادی اور اجتماعی قوت کو مضبوط کرنا ہو گا تاکہ اقوامِ عالم میں ہماری آواز سنی جا سکے۔
یاد رہے کہ جمعۃ المبارک کے روز امیر عبدالقدیر اعوان جامع اسلامیہ میں جمعہ کا خطبہ بھی دیں گے۔
