سوہاوہ: پراپرٹی ٹیکس اور ستھرا پنجاب صفائی ٹیکس کے حوالے سے شہریوں کو درپیش مسائل کے حل کے لیے ایکسائز اینڈ ٹیکسیشن آفیسر جہلم منور حسین نے سوہاوہ کا دورہ کیا، جہاں انہوں نے شہریوں کے ٹیکس سے متعلق اعتراضات اور شکایات سنیں اور متعدد درخواستوں پر موقع پر ہی احکامات جاری کیے، جبکہ دیگر درخواستوں پر دوبارہ جانچ پڑتال کرکے مسائل حل کرنے کی یقین دہانی کروائی۔
دورے کے موقع پر ایکسائز انسپکٹر چوہدری عمران بھی موجود تھے۔ منور حسین نے شہریوں سے پراپرٹی ٹیکس کے حوالے سے درپیش مسائل اور اعتراضات کے بارے میں آگاہی حاصل کی۔ انہوں نے متعلقہ عملے کو ہدایت کی کہ شہریوں کی جائز شکایات اور اعتراضات کو ترجیحی بنیادوں پر حل کیا جائے اور انہیں غیر ضروری دفتری کارروائیوں اور تاخیر سے بچایا جائے۔
ایکسائز اینڈ ٹیکسیشن آفیسر نے انسپکٹر چوہدری عمران کو خصوصی ہدایات جاری کیں کہ سوہاوہ کے شہریوں کو ٹیکس کے معاملات میں درپیش مسائل موقع پر حل کرنے کے لیے مؤثر اقدامات کیے جائیں تاکہ عوام کو سہولت فراہم کی جا سکے۔
اس موقع پر منور حسین نے بتایا کہ ستھرا پنجاب اتھارٹی کے ماہانہ بلز جمع کرنے کی ذمہ داری بھی ایکسائز ڈیپارٹمنٹ کے سپرد کی گئی ہے۔ انہوں نے شہریوں کو ہدایت کی کہ وہ اپنی سہولت کے مطابق ستھرا پنجاب صفائی ٹیکس کے ماہانہ بل آن لائن جمع کروا سکتے ہیں۔
پراپرٹی ٹیکس کے حوالے سے گفتگو کرتے ہوئے منور حسین نے کہا کہ حکومت پنجاب کے مقررہ شیڈول کے مطابق شہریوں کو ٹیکس چالان جاری کیے جاتے ہیں۔ پراپرٹی ٹیکس جمع کروانے کی آخری تاریخ 30 ستمبر تھی، جس کے دوران ٹیکس ادا کرنے والے شہریوں کو پانچ فیصد رعایت بھی فراہم کی گئی تھی۔
انہوں نے مزید بتایا کہ مقررہ تاریخ گزرنے کے بعد پراپرٹی ٹیکس ایک فیصد سرچارج کے ساتھ ادا کیا جا سکتا ہے، جبکہ اگلے ماہ یہ سرچارج دو فیصد تک ہو سکتا ہے۔ انہوں نے شہریوں پر زور دیا کہ وہ اضافی مالی بوجھ سے بچنے کے لیے اپنے پراپرٹی ٹیکس بروقت ادا کریں اور ذمہ دار شہری ہونے کا ثبوت دیں۔
ایکسائز اینڈ ٹیکسیشن آفیسر منور حسین نے شہریوں سے اپیل کی کہ پراپرٹی ٹیکس یا دیگر متعلقہ معاملات کے حوالے سے اگر انہیں کوئی جائز اعتراض یا شکایت درپیش ہو تو وہ تحصیل ایکسائز آفس سوہاوہ یا ڈسٹرکٹ ایکسائز آفس جہلم میں باقاعدہ درخواست جمع کروائیں۔ انہوں نے یقین دہانی کروائی کہ شہریوں کی درخواستوں کا جائزہ لے کر ان کے مسائل ترجیحی بنیادوں پر حل کیے جا رہے ہیں۔
