دینہ پولیس نے چوری کی متعدد وارداتوں میں ملوث معروف بلو گینگ کے تین ملزمان کو گرفتار کر لیا۔
یہ کارروائی ڈی پی او جہلم طارق عزیز سندھو کی خصوصی ہدایت اور ڈی ایس پی صدر سرکل شہباز ہنجرا کی زیر نگرانی ایس ایچ او تھانہ دینہ سرمد الیاس ملک اور ان کی ٹیم نے کی۔
پولیس کے مطابق کارروائی کے دوران ملزمان سے چوری شدہ طلائی زیورات 15 تولے سونا، 10 تولے چاندی (مالیتی تقریباً 70 لاکھ روپے) اور 17 لاکھ روپے نقدی برآمد کر لی گئی۔
پولیس ترجمان کا کہنا ہے کہ ملزمان کے خلاف ٹھوس شواہد اکٹھے کر لیے گئے ہیں اور انہیں عدالت میں چالان کر کے قرار واقعی سزا دلوانے کے لیے مقدمہ کی پیروی جاری ہے۔
ڈی پی او جہلم طارق عزیز سندھو نے ایس ایچ او تھانہ دینہ اور ان کی ٹیم کی بہترین کارکردگی پر شاباش دیتے ہوئے کہا کہ شہریوں کے قیمتی اثاثوں سے محروم کرنے والے عناصر کسی بھی رعایت کے مستحق نہیں۔
انہوں نے مزید کہا کہ ضلع جہلم پولیس عوام کے جان و مال کے تحفظ کے لیے ہمہ وقت سرگرم عمل ہے اور ایسے جرائم پیشہ گروہوں کے خلاف زیرو ٹالرنس پالیسی کے تحت کارروائیاں جاری رہیں گی۔
