سوہاوہ میں جی ٹی روڈ پر دو ٹرکوں میں خوفناک تصادم سے دو افراد جاں بحق جبکہ ایک شخص معمولی زخمی ہو گیا۔
تفصیلات کے مطابق جہلم کی تحصیل سوہاوہ کے علاقے بکڑالہ پل کے قریب جی ٹی روڈ پر دو ٹرکوں کے درمیان خوفناک حادثہ پیش آیا جس کے نتیجے میں دو افراد موقع پر ہی جاں بحق جبکہ ایک شخص زخمی ہو گیا۔ حادثہ اس وقت پیش آیا جب دونوں ٹرک راولپنڈی کی سمت رواں دواں تھے کہ ایک ٹرک تیز رفتاری کے باعث دوسرے ٹرک سے جا ٹکرایا اور سڑک سے نیچے گر کر درختوں میں پھنس گیا۔
ریسکیو 1122 کے مطابق ٹرک میں تین افراد سوار تھے جن میں سے ایک شخص نے خطرہ محسوس کرتے ہوئے فوری طور پر ٹرک سے چھلانگ لگا دی اور معمولی زخمی حالت میں اپنی جان بچانے میں کامیاب ہو گیا، تاہم باقی دو افراد ٹرک کے اندر ہی پھنس گئے۔ ریسکیو ٹیموں نے موقع پر پہنچ کر بھاری مشینری کی مدد سے دونوں افراد کی لاشوں کو نکالا اور انہیں تحصیل ہیڈ کوارٹر ہسپتال سوہاوہ منتقل کر دیا۔
جاں بحق ہونے والوں کی شناخت شمندروز خان ولد شاہ صاحب اور میرمت خان ولد سائل خان کے نام سے ہوئی ہے، دونوں کا تعلق خیبر ایجنسی سے بتایا جاتا ہے۔ حادثے کے بعد جی ٹی روڈ پر ٹریفک کی روانی متاثر رہی تاہم ریسکیو اور پولیس کی مشترکہ کارروائی کے بعد ٹریفک بحال کر دی گئی۔
