جہلم میں ایڈیشنل ڈپٹی کمشنر ریونیو سنیہ صافی کی زیر صدارت ڈسپیوٹ ریزولوشن کمیٹی کا اہم اجلاس منعقد ہوا، جس کا مقصد عوام کو ریونیو اور اراضی سے متعلق شکایات کا فوری اور شفاف حل فراہم کرنا تھا۔
اجلاس میں ضلع بھر سے متعدد سائلین نے شرکت کی اور اپنے اراضی تنازعات، انتقالات میں تاخیر، فردات کے حصول میں مشکلات اور متعلقہ محکموں کے عملے کی کارکردگی سے متعلق مسائل کمیٹی کے سامنے پیش کیے۔
اے ڈی سی آر سنیہ صافی نے کمیٹی کے ممبران کو ہدایت کی کہ سائلین کے تمام معاملات کو میرٹ پر سنا جائے اور قانون کے مطابق جلد از جلد ان کا حل یقینی بنایا جائے۔ انہوں نے واضح کیا کہ عوامی خدمات کی فراہمی میں کسی بھی طرح کی سستی یا تاخیر برداشت نہیں کی جائے گی اور ریونیو ریکارڈ کی درستگی میں کوئی سمجھوتہ نہیں کیا جائے گا۔
شرکا نے ڈی آر سی کے اس اقدام کو سراہا، جس سے انہیں اپنے مسائل کو براہِ راست انتظامیہ کے سامنے پیش کرنے اور حل کی یقین دہانی حاصل کرنے کا موقع ملا۔
