جہلم پولیس نے جرائم پیشہ عناصر کے خلاف کارروائیاں تیز کرتے ہوئے ڈکیتی اور موٹر سائیکل چوری کی متعدد وارداتوں میں ملوث خرم عرف خرما گینگ کے دو اہم ملزمان کو گرفتار کر لیا۔ پولیس کارروائی کے دوران ملزمان کے قبضے سے چوری شدہ موٹر سائیکل، وارداتوں میں استعمال ہونے والا ناجائز اسلحہ اور چھینی گئی نقدی بھی برآمد کر لی گئی۔
تفصیلات کے مطابق جہلم میں ایس ایچ او تھانہ سٹی جہلم اور ان کی ٹیم نے خفیہ اطلاع پر بروقت کارروائی کرتے ہوئے خرم عرف خرما ڈکیت و چور گینگ کے دو ملزمان کو گرفتار کیا۔ پولیس کے مطابق گرفتار ملزمان سے 14 ہزار 600 روپے نقدی، ایک چوری شدہ موٹر سائیکل اور وارداتوں میں استعمال ہونے والا ناجائز اسلحہ پسٹل 30 بور بمعہ ایمونیشن برآمد کیا گیا۔ ملزمان سے ہونے والی مجموعی برآمدگی کی مالیت تقریباً 39 ہزار 600 روپے بتائی جا رہی ہے۔
پولیس حکام کا کہنا ہے کہ گرفتار ملزمان ڈکیتی اور موٹر سائیکل چوری کی متعدد وارداتوں میں ملوث رہے ہیں اور ان کے خلاف مختلف مقدمات درج ہیں۔ مزید تفتیش کے دوران انکشافات کی توقع ہے، جبکہ ملزمان کو ٹھوس شواہد کے ساتھ چالان عدالت پیش کیا جائے گا تاکہ انہیں قرار واقعی سزا دلوائی جا سکے۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ شہریوں کو ان کے قیمتی اثاثوں سے محروم کرنے والے جرائم پیشہ عناصر کسی قسم کی رعایت کے مستحق نہیں۔ انہوں نے واضح کیا کہ ضلع بھر میں جرائم کے خاتمے کے لیے بھرپور اور بلاامتیاز کارروائیاں جاری رہیں گی اور عوام کے جان و مال کے تحفظ کو ہر صورت یقینی بنایا جائے گا۔
