سوہاوہ: ڈومیلی کے نواحی علاقے میں 38 سالہ شخص ٹریکٹر کے نیچے آ کر جاں بحق ہو گیا۔
تفصیلات کے مطابق جہلم کی تحصیل سوہاوہ میں ڈومیلی کے نواحی علاقے میں ایک دلخراش حادثے کے نتیجے میں ٹریکٹر کے نیچے آ کر 38 سالہ شخص شدید زخمی ہونے کے بعد زخموں کی تاب نہ لاتے ہوئے جاں بحق ہو گیا۔
حادثے کی اطلاع ملتے ہی ریسکیو ٹیم فوری طور پر جائے وقوعہ پر پہنچ گئی اور امدادی کارروائیاں شروع کر دیں۔ حادثے میں شدید زخمی ہونے والے شخص کو فوری طبی امداد کے لیے رورل ہیلتھ سنٹر (RHC) ڈومیلی منتقل کیا گیا، تاہم وہ زخموں کی تاب نہ لاتے ہوئے دم توڑ گیا۔
جاں بحق ہونے والے شخص کی شناخت 38 سالہ ساجد جٹ ولد محمد اشرف کے نام سے ہوئی ہے، جو ہنی دھمکار کا رہائشی تھا۔
ساجد جٹ کی اچانک موت کی خبر علاقے میں پہنچتے ہی فضا سوگوار ہو گئی اور ہر آنکھ اشکبار نظر آئی۔ مرحوم کی نمازِ جنازہ ان کے آبائی گاؤں میں ادا کی گئی، جس میں علاقہ کی مختلف سیاسی و سماجی شخصیات، عزیز و اقارب اور اہلِ علاقہ نے بڑی تعداد میں شرکت کی۔
