جہلم شہر سمیت ضلع بھر میں قائم متعدد پٹرول پمپس، شادی ہالز، مارکیز اور ہوٹلوں پر حفاظتی (سیفٹی) انتظامات کی غیر موجودگی نے شہریوں میں شدید تشویش پیدا کر دی ہے۔ ناقص اور نامکمل سیفٹی انتظامات کے باعث شہریوں کے سروں پر خوف کے سائے منڈلانے لگے ہیں، جبکہ کسی بھی ناخوشگوار واقعے کے خدشات دن بہ دن بڑھتے جا رہے ہیں۔
شہریوں کا کہنا ہے کہ بیشتر پٹرول پمپس اور شادی ہالز میں فائر فائٹنگ آلات، ایمرجنسی اخراجی راستے، فائر الارم سسٹم، ریت اور پانی کی دستیابی یا تو موجود ہی نہیں یا پھر ناقابل استعمال حالت میں ہیں۔ علاوہ ازیں کئی مقامات پر عملے کو ہنگامی صورتحال سے نمٹنے کی کوئی تربیت نہیں دی گئی، جو ایک سنگین غفلت کے مترادف ہے۔
عوامی حلقوں نے اس امر پر افسوس کا اظہار کیا ہے کہ سول ڈیفنس کے قواعد و ضوابط اور حفاظتی قوانین موجود ہونے کے باوجود ان پر مؤثر عملدرآمد نظر نہیں آ رہا، جس کی وجہ سے قیمتی انسانی جانوں کو خطرات لاحق ہیں۔ شہریوں نے مطالبہ کیا ہے کہ ڈپٹی کمشنر اور کنٹرولر سول ڈیفنس اس صورتحال کا فوری نوٹس لیں اور ضلع بھر میں قائم پٹرول پمپس، پلازوں، شاپنگ مالز، شادی ہالز، مارکیز اور بڑے ہوٹلوں کا جامع معائنہ کروایا جائے۔
شہریوں نے مزید مطالبہ کیا کہ جن مالکان نے سیفٹی قوانین کو نظرانداز کر رکھا ہے، ان کے خلاف سخت قانونی کارروائی عمل میں لائی جائے، تاکہ مستقبل میں کسی بھی بڑے حادثے سے بچا جا سکے اور عوام کو محفوظ ماحول فراہم کیا جا سکے۔
عوامی و سماجی حلقوں نے امید ظاہر کی ہے کہ ضلعی انتظامیہ اس سنگین مسئلے پر فوری توجہ دے کر حفاظتی اقدامات کو یقینی بنائے گی، تاکہ شہری بلا خوف و خطر اپنی روزمرہ سرگرمیاں انجام دے سکیں۔
