سوہاوہ: گورنمنٹ ڈگری کالج رسولپور میں اسسٹنٹ کمشنر سوہاوہ غزالہ اصغر نے یونین کونسل ججیال کے نمبرداروں، کسانوں، حلقہ پٹواریوں، یوسی سیکرٹری اور دیگر سماجی شخصیات کے ساتھ ایک اہم میٹنگ کا انعقاد کیا۔
میٹنگ میں صوبیدار مسعود احمد، چوہدری یونس، نمبردار مہرامان اللہ، نمبردار علی منصور، نمبردار راجہ کاظم، نکاح خواں حافظ سعید ریاض، یاسر محمود پٹواری، سیف علی ناصر پٹواری، چوہدری اویس پٹواری، سیکرٹری یوسی نگیال ندیم الحق، چوہدری شاہد منظور، چوہدری رمضان، خالد محمود سمیت دیگر نمائندگان نے شرکت کی۔
میٹنگ کے دوران سائلین نے اپنے مسائل اور شکایات کے انبار لگا دیے جن میں زمین کی تقسیم، ستھراپنجاب کی ٹیم کی کارکردگی، صفائی کے مسائل اور دیگر عوامی مشکلات شامل تھیں۔ اس موقع پر اسسٹنٹ کمشنر غزالہ اصغر نے مرد و خواتین سائلین کے مسائل غور سے سنے اور فوری حل کے لیے متعلقہ پٹواریوں کو دو دن کے اندر رپورٹ پیش کرنے کی ہدایات جاری کیں۔
غزالہ اصغر نے شرکاء سے خطاب کرتے ہوئے کہا کہ اس میٹنگ کا مقصد مشترکہ زمینوں کی ونڈ کے حوالے سے آگاہی دینا ہے۔ انہوں نے شہریوں کو ہدایت کی کہ اپنی اپنی مشترکہ زمینوں کی ونڈ جلد از جلد کرائیں تاکہ مستقبل میں کسی قسم کی مشکلات پیش نہ آئیں۔ انہوں نے مزید کہا کہ ستھراپنجاب کے ورکرز کی تعداد میں اضافہ کے لیے درخواست دی گئی ہے اور جلد نئے ورکرز بھرتی کیے جائیں گے۔
اس کے علاوہ اسسٹنٹ کمشنر نے شہریوں کو یہ بھی ہدایت کی کہ صفائی کا خاص خیال رکھیں، کوڑا دان میں کچرا ڈالیں اور مزید کوڑا دان جلد لگائے جائیں گے۔ شہری کسی بھی شکایت کے لیے 8039 پر کال کر سکتے ہیں۔ انہوں نے منافع خوری کے خلاف شہریوں کو ریٹ لسٹ کے مطابق اشیاء کی خریداری کی ہدایت کی اور بتایا کہ گوشت، سبزیوں، فروٹ اور دیگر اشیاء کی قیمتوں میں غیرقانونی اضافہ کرنے والوں کی اطلاع بھی متعلقہ سیکرٹری کو دی جائے۔
غزالہ اصغر نے شہریوں کو ہدایت کی کہ اردگرد کے آوارہ کتوں کی معلومات متعلقہ سیکرٹری کو فراہم کریں تاکہ انہیں بروقت تلف کیا جا سکے۔ ہر موضع میں کمیٹیاں بنا دی گئی ہیں جو مسائل سے آگاہ کریں گی اور اقدامات کے لیے معاون ثابت ہوں گی۔
میٹنگ کے کامیاب انعقاد پر سیکرٹری یوسی ججیال حاجی عبدالرزاق کو خصوصی خراج تحسین پیش کیا گیا۔ بعد ازاں اسسٹنٹ کمشنر سوہاوہ نے دفتر یونین کونسل ججیال کا دورہ کیا اور ریکارڈ کی جانچ پڑتال کی۔
