جہلم: ریونیو سے متعلقہ امور میں شفافیت، بہتری اور بروقت تکمیل کو یقینی بنانے کے لیے ڈپٹی کمشنر جہلم میر رضا اوزگن کی زیرِ صدارت ایک اہم اجلاس منعقد ہوا۔
اجلاس میں ایڈیشنل ڈپٹی کمشنر ریونیو سنیہ صافی اور اسسٹنٹ کمشنر جہلم عبدالسمیع شیخ نے بھی شرکت کی، جہاں ریونیو ریکارڈ اور جاری معاملات پر تفصیلی بریفنگ دی گئی۔
اجلاس کے دوران ڈپٹی کمشنر جہلم میر رضا اوزگن نے ریونیو ریکوری، انتقالِ وراثت اور زمینوں کے ریکارڈ کی درستگی کا تفصیلی جائزہ لیا۔ انہوں نے واضح ہدایات جاری کیں کہ ریونیو سے متعلق عوامی شکایات کے فوری ازالے کے لیے ضلعی دفاتر کے دروازے شہریوں کے لیے کھلے رکھے جائیں اور اس حوالے سے کسی بھی قسم کی غفلت یا کوتاہی برداشت نہیں کی جائے گی۔
ڈپٹی کمشنر نے ایڈیشنل ڈپٹی کمشنر ریونیو سنیہ صافی اور اسسٹنٹ کمشنر عبدالسمیع شیخ کو ہدایت کی کہ وہ اپنے ماتحت عملے کی کارکردگی کی ڈیلی بیسز پر نگرانی کریں، تاکہ شہریوں کو پٹوار خانوں اور تحصیل دفاتر کے غیر ضروری چکر نہ لگانے پڑیں۔ انہوں نے کہا کہ ریونیو معاملات میں میرٹ، شفافیت اور عوامی سہولت ضلعی انتظامیہ کی اولین ترجیح ہے۔
اجلاس کے اختتام پر ڈپٹی کمشنر جہلم میر رضا اوزگن نے ہدایت کی کہ ریونیو ریکوری کے اہداف کو بروقت مکمل کیا جائے اور تمام پیش رفت سے ضلعی انتظامیہ کو باقاعدگی سے آگاہ رکھا جائے۔ انہوں نے اس عزم کا اعادہ کیا کہ شہریوں کو ریونیو سے متعلق خدمات کی فراہمی میں کسی قسم کی رکاوٹ برداشت نہیں کی جائے گی اور عوامی سہولت کے لیے انتظامیہ ہر وقت دستیاب رہے گی۔
