جہلم: پاکستان مسلم لیگ (ن) کے مرکزی رہنما اور رکن قومی اسمبلی چوہدری فرخ الطاف نے اسلام آباد کی امام بارگاہ میں ہونے والے بم دھماکے کی شدید الفاظ میں مذمت کرتے ہوئے اسے سفاک، بزدلانہ اور انسانیت سوز کارروائی قرار دیا ہے۔ انہوں نے کہا کہ عبادت گاہوں کو نشانہ بنانا کھلی درندگی ہے اور ایسے دہشت گرد نہ مسلمان کہلانے کے مستحق ہیں اور نہ ہی انسان۔
چوہدری فرخ الطاف نے کہا کہ معصوم شہریوں کا خون بہانے والے عناصر درحقیقت انسانیت کے دشمن ہیں، جو ملک میں خوف و ہراس پھیلانا چاہتے ہیں، تاہم پاکستانی قوم ان کے ناپاک عزائم کو کبھی کامیاب نہیں ہونے دے گی۔ انہوں نے حکومت سے مطالبہ کیا کہ اس افسوسناک واقعے میں ملوث تمام دہشت گردوں اور ان کے سہولت کاروں کو فوری طور پر کیفرِ کردار تک پہنچایا جائے تاکہ آئندہ کوئی ایسی جرأت نہ کر سکے۔
انہوں نے مزید کہا کہ پاکستان مسلم لیگ (ن) ہمیشہ امن، رواداری اور بین المذاہب ہم آہنگی کی علمبردار رہی ہے اور ہر اس قوت کے خلاف سیسہ پلائی دیوار بنے گی جو ملک کے امن کو سبوتاژ کرنے کی کوشش کرے۔ ان کا کہنا تھا کہ دہشت گردی کے خلاف جنگ میں تمام سیاسی جماعتوں، اداروں اور عوام کو ایک پیج پر آنا ہوگا۔
آخر میں چوہدری فرخ الطاف نے شہداء کے درجات کی بلندی، زخمیوں کی جلد صحت یابی اور لواحقین کے لیے صبرِ جمیل کی دعا کرتے ہوئے اس عزم کا اظہار کیا کہ مسلم لیگ (ن) ملک میں امن کے قیام اور معصوم شہریوں کے تحفظ کے لیے ہر ممکن کردار ادا کرتی رہے گی۔
