جہلم: ڈی ایس پی موٹروے پولیس سرائے عالمگیر چوہدری عمران محمود سے جہلم پریس کلب کے نمائندہ وفد نے ان کے دفتر میں ملاقات کی۔
وفد کی قیادت چیئرمین جہلم پریس کلب چوہدری عابد محمود نے کی جبکہ وفد میں جنرل سیکرٹری الیاس صادق وٹو، نائب صدر مرزا قدیر بیگ، انفارمیشن سیکرٹری سید ناصر محمود، صدر ڈسٹرکٹ یونین آف جرنلسٹ چوہدری مہربان حسین، چوہدری ظفر نور، صائمہ سحر، مقصود احمد نقیبی، چوہدری دانیال عابد اور چوہدری تصور حسین شامل تھے۔
اس موقع پر گفتگو کرتے ہوئے ڈی ایس پی چوہدری عمران محمود نے صحافتی برادری کے مثبت اور تعمیری کردار کو سراہتے ہوئے کہا کہ میڈیا معاشرے میں شعور اجاگر کرنے اور عوام کو درست معلومات کی فراہمی میں ریڑھ کی ہڈی کی حیثیت رکھتا ہے۔ انہوں نے کہا کہ سیکٹر کمانڈر این فائیو نارتھ-2 زاہد نزیر وریا (پی ایس پی) کی ترجیحات کے مطابق موٹروے پولیس پوری تندہی اور فرض شناسی کے ساتھ اپنے فرائض سرانجام دے رہی ہے۔
ڈی ایس پی عمران محمود کا کہنا تھا کہ سیکٹر کمانڈر کا واضح ویژن مسافروں کو محفوظ، پُرسکون اور بااعتماد سفر کی سہولت فراہم کرنا ہے، اور اسی ویژن کے تحت موٹروے پولیس کے افسران و اہلکار ہمہ وقت پیٹرولنگ پر مامور ہیں۔ انہوں نے بتایا کہ تیز رفتاری، اوور لوڈنگ، ون وے کی خلاف ورزی، غیر محتاط ڈرائیونگ، بغیر ہیلمٹ موٹر سائیکل سواروں، سائیڈ مرر نہ ہونے اور ایک موٹر سائیکل پر تین افراد کے سفر کرنے سمیت بغیر رجسٹرڈ گاڑیوں کے خلاف بلا تفریق سخت قانونی کارروائیاں کی جا رہی ہیں۔
انہوں نے روڈ یوزرز سے اپیل کی کہ وہ اپنی اور دوسروں کی جانوں کے تحفظ کے لیے ٹریفک قوانین پر سختی سے عمل کریں کیونکہ معمولی سی غفلت بھی قیمتی جانوں کے ضیاع کا سبب بن سکتی ہے۔ ڈی ایس پی عمران محمود نے واضح کیا کہ موٹروے پولیس کی اولین ترجیح ٹریفک کو منظم رکھنا اور جی ٹی روڈ پر سفر کرنے والوں کو ہر ممکن سہولت فراہم کرنا ہے، جبکہ کسی بھی مسافر کی ہیلپ کال پر فوری مدد فراہم کی جاتی ہے۔
انہوں نے مزید کہا کہ ماتحت افسران کو سختی سے ہدایات جاری کی گئی ہیں کہ روڈ یوزرز سے خوش اخلاقی، برداشت اور پیشہ ورانہ رویہ اختیار کیا جائے تاکہ موٹروے پولیس عوام کی خدمت کی روشن مثال بن کر سامنے آئے۔ اس موقع پر موٹروے انسپکٹر صعیب قریشی، انسپکٹر طاہر شہزاد اور ایڈمن آفیسر چوہدری اللہ دتہ بھی موجود تھے۔
