جہلم میں سی سی ڈی اور آزاد کشمیر پولیس سے مبینہ مقابلے میں بینک ملازم کو ڈکیتی کے دوران قتل کرنے والے 2 خطرناک ڈاکو مارے گئے۔
تفصیلات کے مطابق جہلم کے علاقے وچلا بیلہ کے مقام پر کرائم کنٹرول ڈیپارٹمنٹ کی ٹیم اور آزادکشمیر پولیس کا خطرناک ڈاکوؤں کے درمیان مبینہ مقابلہ ہوا ، جس کے نتیجے میں دو ملزمان اپنے ہی ساتھیوں کی فائرنگ سے ہلاک ہو گئے جبکہ دیگر ملزمان اندھیرے کا فائدہ اٹھاتے ہوئے فرار ہونے میں کامیاب ہو گئے۔
ذرائع کے مطابق رواں سال 7 جنوری کو میرپور آزادکشمیر کے علاقے چیچیاں سے جہلم آنے والے کوٹھا سواریہ کے رہائشی نوجوان بینک ملازم نعمان مصطفیٰ کو دورانِ ڈکیتی مزاحمت پر فائرنگ کر کے قتل کر دیا گیا تھا، جس کا مقدمہ تھانہ صدر جہلم میں درج کیا گیا۔ جہلم پولیس نے جدید سائنٹفک طریقۂ تفتیش سے ملزمان کو ٹریس کر کے آزاد کشمیر پولیس کو اطلاع دی، جس پر آزاد کشمیر سے ملزمان کو گرفتار کر لیا گیا تھا۔
اطلاعات کے مطابق آزاد کشمیر پولیس اور سی سی ڈی جہلم کی ٹیم گرفتار ملزمان کو اسلحہ برآمدگی کے لیے لے جا رہی تھی کہ وچلہ بیلہ کے مقام پر ملزمان کے ساتھیوں نے پولیس پارٹی پر اچانک فائرنگ شروع کر دی۔ فائرنگ کے تبادلے کے دوران زیر حراست ملزمان عدیل اور امتیاز اپنے ہی ساتھیوں کی گولیوں سے موقع پر ہلاک ہو گئے۔ لاشوں کو ضابطے کی کارروائی کے لیے اسپتال منتقل کر دیا گیا ہے۔
پولیس کے مطابق فرار ہونے والے ملزمان کی گرفتاری کے لیے علاقے میں سرچ آپریشن جاری ہے اور جلد گرفتاری کی توقع ظاہر کی جا رہی ہے۔ حکام کا کہنا ہے کہ سنگین جرائم میں ملوث عناصر کے خلاف کارروائیاں بلا تعطل جاری رہیں گی۔
