جہلم: مشرق وسطیٰ میں کشیدگی اور توانائی کے ممکنہ بحران کے دوران ایل پی جی مافیا نے گیس کی قیمت میں من مانا ہوشربا اضافہ کردیا ہے۔
تفصیلات کے مطابق جہلم شہر اور ملحقہ علاقوں میں سوئی گیس کی شدید قلت کے باعث شہریوں کو شدید مشکلات کا سامنا ہے جبکہ متبادل کے طور پر استعمال ہونے والی ایل پی جی کی قیمت بھی آسمان سے باتیں کرنے لگی ہے۔
ذرائع کے مطابق سوئی گیس کی غیر اعلانیہ بندش اور کم پریشر کے باعث صارفین ایل پی جی سلنڈر استعمال کرنے پر مجبور ہو گئے ہیں، جس کی قیمت بڑھ کر 500 روپے فی کلو تک جا پہنچی ہے۔
شہریوں کا کہنا ہے کہ مہنگائی کے اس دور میں گیس کی قلت نے ان کی مشکلات میں مزید اضافہ کر دیا ہے، جس پر وہ شدید احتجاج کر رہے ہیں۔
متاثرہ شہریوں نے وزیر اعظم پاکستان شہباز شریف سے مطالبہ کیا ہے کہ سوئی گیس کی فوری بحالی کو یقینی بنایا جائے اور ایل پی جی کی قیمتوں میں کمی کے لیے ہنگامی اقدامات کیے جائیں تاکہ عوام کو ریلیف فراہم کیا جا سکے۔
