جہلم: مسیحی برادری کے مقدس دن گڈ فرائیڈے اور خوشیوں بھرے تہوار ایسٹر کے موقع پر ضلعی انتظامیہ جہلم کے زیرِ اہتمام ایک پروقار تقریب کا انعقاد کیا گیا، جس میں بین المذاہب ہم آہنگی کا خوبصورت مظاہرہ دیکھنے میں آیا۔
تقریب ایڈیشنل ڈپٹی کمشنر ریونیو سنیہ صافی اور اسسٹنٹ کمشنر جہلم آفتاب اشرف کی زیرِ نگرانی منعقد ہوئی، جس میں کیک کاٹا گیا اور مسیحی برادری میں تحائف تقسیم کیے گئے۔ اس موقع پر سی ای او ایجوکیشن نازیہ شہزادی، سماجی کارکن ایڈووکیٹ فرحت کمال اور مسیحی برادری کے معززین بھی موجود تھے۔
ایڈیشنل ڈپٹی کمشنر ریونیو سنیہ صافی نے اپنے خطاب میں مسیحی برادری کو ایسٹر اور گڈ فرائیڈے کی مبارکباد دیتے ہوئے کہا کہ اقلیتوں کے حقوق کا تحفظ اور ان کی خوشیوں میں شریک ہونا حکومت کی اولین ترجیحات میں شامل ہے۔ انہوں نے کہا کہ تمام مذاہب کے ماننے والے پاکستان کی ترقی میں برابر کے شریک ہیں اور یہ تقریب بین المذاہب ہم آہنگی کی بہترین مثال ہے۔
اسسٹنٹ کمشنر آفتاب اشرف اور سی ای او ایجوکیشن نازیہ شہزادی نے بھی اس موقع پر خطاب کرتے ہوئے کہا کہ ضلعی انتظامیہ اقلیتی برادری کو ہر ممکن تحفظ اور سہولیات فراہم کرنے کے لیے پرعزم ہے۔
سماجی کارکن ایڈووکیٹ فرحت کمال نے انتظامیہ کے اس اقدام کو سراہتے ہوئے کہا کہ ایسے پروگرامز سے معاشرے میں بھائی چارے اور رواداری کو فروغ ملتا ہے۔
تقریب کے اختتام پر مسیحی برادری کی خوشحالی اور ملک کی سلامتی کے لیے خصوصی دعا بھی کی گئی۔
