دینہ: اسسٹنٹ کمشنر دینہ صفاء عابد نے مہنگے داموں گوشت فروخت کرنے والوں کے خلاف سخت کارروائی کرتے ہوئے دو دکانیں سیل کر دیں جبکہ ایک دکاندار کو 5 ہزار روپے جرمانہ عائد کیا۔ متعدد گوشت فروشوں کو وارننگ بھی جاری کی گئی۔
تفصیلات کے مطابق اسسٹنٹ کمشنر نے منگلا روڈ دینہ پر اچانک چھاپہ مارا اور دیکھا کہ قصاب سرکاری نرخوں سے زائد قیمت پر گوشت فروخت کر رہے تھے۔ حکومت کی جانب سے مقرر کردہ نرخ کے مطابق چھوٹے گوشت کی قیمت 1600 روپے فی کلو اور بڑے گوشت کی قیمت 800 روپے فی کلو مقرر ہے، تاہم دکاندار ان قیمتوں سے زیادہ وصول کر رہے تھے۔
اسسٹنٹ کمشنر صفاء عابد نے واضح ہدایت جاری کرتے ہوئے کہا کہ آئندہ اگر کوئی بھی دکاندار سرکاری نرخ سے زائد قیمت پر گوشت فروخت کرتا پایا گیا تو اس کے خلاف سخت قانونی کارروائی کی جائے گی۔
انہوں نے مزید کہا کہ ماہ رمضان میں دکاندار حضرات عوام اور روزہ داروں کا خیال رکھیں اور اشیائے خورونوش کو ناجائز منافع خوری کا ذریعہ نہ بنائیں۔
