جہلم: ڈپٹی کمشنر جہلم میر رضا اوزگن کی ہدایت پر اسسٹنٹ کمشنر جہلم آفتاب اشرف نے پبلک ہیلتھ انجینئرنگ ڈیپارٹمنٹ جہلم کا اچانک دورہ کیا اور محکمانہ امور، عوامی خدمات اور جاری سرگرمیوں کا تفصیلی جائزہ لیا۔
دورے کے دوران اسسٹنٹ کمشنر نے عملے کی حاضری، صفائی ستھرائی کے انتظامات، عوام کو فراہم کی جانے والی سہولیات اور مختلف شعبہ جات کی کارکردگی کا معائنہ کیا۔ انہوں نے محکمہ کے افسران اور عملے سے ملاقات کرتے ہوئے مختلف انتظامی امور پر بریفنگ بھی حاصل کی۔
اس موقع پر آفتاب اشرف نے واٹر ٹیسٹنگ لیبارٹری کا خصوصی دورہ کیا جہاں پینے کے پانی کے معیار کی جانچ کے طریقہ کار، لیبارٹری میں دستیاب جدید آلات اور ٹیسٹنگ کے نظام کا تفصیلی جائزہ لیا گیا۔ متعلقہ افسران نے انہیں پانی کے نمونوں کی جانچ، معیار کی نگرانی اور لیبارٹری کی مجموعی کارکردگی کے حوالے سے بریفنگ دی۔
اسسٹنٹ کمشنر نے محکمہ کی جاری ترقیاتی اور تکنیکی سرگرمیوں، مشینری و آلات کی فعالیت اور عوامی شکایات کے ازالے کے نظام کا بھی معائنہ کیا۔ انہوں نے متعلقہ حکام سے مختلف منصوبوں اور جاری کاموں کی پیش رفت کے بارے میں تفصیلی معلومات حاصل کیں۔
آفتاب اشرف نے ہدایت کی کہ شہریوں کو صاف، محفوظ اور معیاری پینے کے پانی کی فراہمی ہر صورت یقینی بنائی جائے۔ انہوں نے کہا کہ عوامی شکایات کا بروقت ازالہ اور بنیادی سہولیات کی فراہمی محکمہ کی اولین ذمہ داری ہے، جس میں کسی قسم کی غفلت برداشت نہیں کی جائے گی۔
انہوں نے مزید ہدایت کی کہ تمام ترقیاتی اور تکنیکی منصوبے مقررہ معیار کے مطابق مکمل کیے جائیں اور فیلڈ سرگرمیوں کی مؤثر نگرانی کو یقینی بنایا جائے تاکہ عوام کو بہتر اور معیاری خدمات فراہم کی جا سکیں۔
اسسٹنٹ کمشنر جہلم نے اس بات پر زور دیا کہ محکمانہ نظم و ضبط، شفافیت اور عوامی خدمت کے معیار کو مزید بہتر بنایا جائے۔ انہوں نے کہا کہ ضلعی انتظامیہ عوامی فلاح و بہبود کے منصوبوں اور بنیادی سہولیات کی فراہمی کے حوالے سے مسلسل نگرانی کر رہی ہے تاکہ شہریوں کو بہترین سہولیات میسر آ سکیں۔
دورے کے اختتام پر انہوں نے متعلقہ افسران کو ہدایت کی کہ عوامی خدمت کے جذبے کے تحت اپنی ذمہ داریاں انجام دیں اور شہریوں کو درپیش مسائل کے حل کے لیے فوری اور مؤثر اقدامات یقینی بنائیں۔
