جہلم: بلدیاتی اداروں کی آمدن میں اضافے اور سرکاری املاک کے موثر استعمال کو یقینی بنانے کے لیے ایڈیشنل ڈپٹی کمشنر (ریونیو) سنیہ صافی کی زیر نگرانی ضلع کونسل ہال میں میونسپل کمیٹی کی دکانوں کی نیلامی منعقد کی گئی، جس میں مختلف افراد نے بھرپور دلچسپی کا اظہار کرتے ہوئے بولی کے عمل میں حصہ لیا۔
نیلامی کے دوران میونسپل کمیٹی کی مختلف دکانوں کے لیے بولیاں وصول کی گئیں۔ ایڈیشنل ڈپٹی کمشنر (ریونیو) نے تمام مراحل کی خود نگرانی کرتے ہوئے اس امر کو یقینی بنایا کہ نیلامی کا عمل مکمل شفافیت، میرٹ اور مقررہ قواعد و ضوابط کے مطابق انجام پائے۔ اس موقع پر متعلقہ محکموں کا عملہ بھی موجود تھا۔
ایڈیشنل ڈپٹی کمشنر (ریونیو) سنیہ صافی نے کہا کہ سرکاری املاک کا شفاف، مؤثر اور عوامی مفاد کے مطابق استعمال حکومت پنجاب کی اہم ترجیحات میں شامل ہے۔ انہوں نے متعلقہ افسران کو ہدایت کی کہ نیلامی سے متعلق تمام قانونی تقاضے، دستاویزی کارروائی اور ریکارڈ کی تکمیل بروقت یقینی بنائی جائے۔
انہوں نے مزید کہا کہ اس قسم کے شفاف اقدامات سے نہ صرف بلدیاتی اداروں کے مالی وسائل میں اضافہ ہوگا بلکہ عوامی مفاد کا تحفظ اور سرکاری املاک کا بہتر انتظام بھی یقینی بنایا جا سکے گا۔
جہلم کی تاریخ میں پہلی بار ایک شفاف منصفانہ اور میرٹ پر مبنی بولی کا انعقاد ہوا۔جس میں کسی قسم کے دباؤ بلیک میلنگ یا مافیاز کو دخل اندازی کا موقع نہیں ملا۔ یہ اقدام انصاف اور قانون کی بالادستی کی ایک قابلِ تحسین مثال ہے۔
تاجر برادری اس منصفانہ اقدام پر متعلقہ انتظامیہ کی تہہ دل سے شکر گزار ہے اور اسے ایک مثبت اور حوصلہ افزا پیش رفت قرار دیتی ہے۔ وہ پُرامید ہے کہ جو دکانیں تاحال سیل ہیں وہ بھی جلد اُن ہی افراد کے حوالے کی جائیں گی جو برسوں سے وہاں جائز طور پر اپنا کاروبار کر رہے ہیں۔ حقیقی حق داروں کو اُن کا حق دینا ہی انصاف شفافیت اور عوامی اعتماد کی اصل بنیاد ہے۔