پنڈدادنخان پولیس کی اہم کارروائی، دفعہ 144 کی خلاف ورزی کرنے اور کشتی (بیڑہ) کے ذریعے بغیر حفاظتی انتظامات کے منی مزدا، ٹریکٹر اور شہریوں کو دریا پار کروانے والے 2 ملزمان کو گرفتار کر لیا۔
تفصیلات کے مطابق تھانہ پنڈدادنخان پولیس نے انسانی جانوں کو خطرے میں ڈالنے اور دفعہ 144 کی خلاف ورزی پر کارروائی کرتے ہوئے دو ملزمان کو گرفتار کر لیا جو مبینہ طور پر بغیر حفاظتی انتظامات کے کشتی (بیڑہ) کے ذریعے گاڑیاں اور شہریوں کو دریا پار کرا رہے تھے۔
ترجمان جہلم پولیس کے مطابق ایس ایچ او تھانہ پنڈدادنخان اور ان کی ٹیم کو اطلاع موصول ہوئی کہ دو افراد کشتی (بیڑہ) کے ذریعے بغیر کسی حفاظتی انتظامات کے منی مزدا، ٹریکٹر اور متعدد شہریوں کو دریا پار کرا رہے ہیں، جس سے کسی بھی وقت بڑے حادثے کا خدشہ تھا۔
اطلاع ملتے ہی پولیس نے فوری کارروائی کرتے ہوئے دونوں ملزمان کو گرفتار کر لیا۔ پولیس کے مطابق ملزمان کے خلاف تھانہ پنڈدادنخان میں مقدمہ درج کر کے مزید تفتیش کا آغاز کر دیا گیا ہے۔
ڈی پی او جہلم شفیق احمد چوہدری نے کہا کہ شہریوں کے جان و مال کا تحفظ جہلم پولیس کی اولین ترجیح ہے۔ انہوں نے واضح کیا کہ انسانی جانوں کو خطرے میں ڈالنے والے عناصر اور حکومتی احکامات، خصوصاً دفعہ 144 کی خلاف ورزی کرنے والوں کے خلاف بلاامتیاز کارروائیاں جاری رہیں گی اور قانون کے مطابق سخت قانونی کارروائی عمل میں لائی جائے گی۔
