جہلم: محکمہ ریونیو میں گزشتہ کئی کئی ماہ سے زیر التوا رہنے والے کام اب دنوں میں نمٹائے جانے لگے ہیں، جبکہ تحصیل آفس میں حال ہی میں تعینات ہونے والے چند نئے ملازمین کی کارکردگی پر شہریوں نے اعتماد اور اطمینان کا اظہار کیا ہے۔
تحصیل آفس آنے والے سائلین کا کہنا ہے کہ چند ملازمین کی تبدیلی کے بعد پہلے کی نسبت کام کے معاملات میں کچھ بہتری محسوس کی جا رہی ہے اور شہریوں کے مسائل بھی حل کیے جا رہے ہیں۔
سائلین کے مطابق تحصیل آفس میں چند نئے ملازمین کی تعیناتی کے بعد زیر التوا معاملات کو نمٹانے کی رفتار میں بہتری آئی ہے۔ شہریوں کا کہنا ہے کہ اگر تمام ملازمین کو تبدیل کر کے نئے اور ذمہ دار اہلکار تعینات کیے جاتے تو محکمہ ریونیو کے امور میں مزید بہتری لائی جا سکتی تھی اور سائلین کو درپیش مسائل بھی زیادہ تیزی سے حل ہونے کی توقع ہے۔
شہریوں کے مطابق تحصیل آفس میں متعدد ایسے معاملات بھی موجود تھے جو گزشتہ سات، آٹھ سال سے زیر التوا چلے آ رہے تھے، تاہم اب ان میں سے بعض معاملات کو چند ہی دنوں میں نمٹایا جا رہا ہے۔ سائلین نے اس پیش رفت کو خوش آئند قرار دیتے ہوئے کہا ہے کہ اگر اسی رفتار کو برقرار رکھا جائے تو طویل عرصے سے زیر التوا ریونیو معاملات میں نمایاں کمی لائی جا سکتی ہے۔
دوسری جانب رجسٹری آفس واہ کینٹ میں بھی شہریوں کو دفتر میں داخل ہونے اور متعلقہ افسران سے براہِ راست ملاقات کی سہولت میسر ہونے کی اطلاعات ہیں۔ سائلین کا کہنا ہے کہ انہیں افسران تک رسائی کے لیے غیر ضروری رکاوٹوں کا سامنا نہیں کرنا پڑ رہا، جبکہ متعلقہ افسران شہریوں کی شکایات اور مسائل براہِ راست سن رہے ہیں۔
سائلین کے مطابق موجودہ افسران ایک ہی وقت میں درجنوں شہریوں کی شکایات اور مسائل سن رہے ہیں اور متعدد معاملات میں موقع پر ہی ضروری احکامات بھی جاری کیے جا رہے ہیں، جس سے شہریوں کو اپنے مسائل کے حل کے لیے بار بار دفاتر کے چکر لگانے کی ضرورت کم ہو رہی ہے۔
شہری حلقوں نے محکمہ ریونیو اور متعلقہ تحصیل و رجسٹری دفاتر میں کام کی رفتار اور سائلین تک افسران کی براہِ راست رسائی میں آنے والی بہتری کو سراہتے ہوئے مطالبہ کیا ہے کہ اس عمل کو مستقل بنیادوں پر جاری رکھا جائے اور برسوں سے زیر التوا دیگر معاملات کو بھی ترجیحی بنیادوں پر نمٹانے کے لیے مؤثر اقدامات کیے جائیں۔
