سوہاوہ: پٹرولنگ پولیس راولپنڈی ریجن نے یومِ تشکر کو بھرپور جذبۂ حب الوطنی کے ساتھ منایا۔
ایس ایس پی محمد بن اشرف کی ہدایات پر ریجن کی تمام پٹرولنگ پوسٹوں پر پرچم کشائی، قرآن خوانی، دعائیہ تقاریب اور خصوصی ریلیوں کا اہتمام کیا گیا۔
تقریبات کا مقصد وطن کی حفاظت کے لیے جانوں کا نذرانہ پیش کرنے والے شہداء کو خراجِ عقیدت پیش کرنا تھا۔ اس موقع پر پولیس افسران و اہلکاروں نے شہداء کی عظیم قربانیوں کو سراہا اور ان کے درجات کی بلندی کے لیے خصوصی دعائیں کی گئیں۔
افسران نے اظہارِ خیال کرتے ہوئے کہا کہ پاکستانی فوج ہمارا فخر ہے اور شہداء ہمارے محسن ہیں جنہوں نے اپنی جانیں قربان کر کے اس وطن کی بنیادوں کو مضبوط کیا۔ ہم اپنے ان عظیم ہیروز کو سلام پیش کرتے ہیں اور ان کے مشن کو جاری رکھنے کے عزم کا اعادہ کرتے ہیں۔
تقریبات میں شریک اہلکاروں نے قومی پرچم کو سلامی دی، قومی ترانہ پڑھا اور خصوصی ریلیوں کے ذریعے اتحاد و یکجہتی کا پیغام دیا۔ یومِ تشکر کی یہ سرگرمیاں وطن سے محبت کے عملی اظہار کا مظہر تھیں اور پٹرولنگ پولیس راولپنڈی ریجن کی جانب سے امن، استحکام اور قربانی کی اعلیٰ روایات کو زندہ رکھنے کا عملی ثبوت بھی۔
