جہلم: ضلع جہلم میں دریاؤں، ندی نالوں، نہروں اور دیگر آبی گزرگاہوں میں نہانے پر عائد پابندی کی خلاف ورزی کرنے والوں کے خلاف پولیس کا کریک ڈاؤن جاری ہے۔ تازہ کارروائی کے دوران دفعہ 144 کی خلاف ورزی پر 8 افراد کو گرفتار کر کے ان کے خلاف مقدمہ درج کر لیا گیا۔
ترجمان جہلم پولیس کے مطابق ڈسٹرکٹ پولیس آفیسر (ڈی پی او) شفیق احمد چوہدری کی ہدایات پر ضلع بھر میں دریاؤں، ندی نالوں، نہروں اور دیگر آبی مقامات پر نہانے پر عائد پابندی پر سختی سے عملدرآمد کرایا جا رہا ہے تاکہ حادثات کی روک تھام اور قیمتی انسانی جانوں کا تحفظ یقینی بنایا جا سکے۔
اسی سلسلے میں تھانہ پنڈدادنخان پولیس نے کارروائی کرتے ہوئے دفعہ 144 کی خلاف ورزی کرتے ہوئے دریا میں نہانے والے 8 افراد کو گرفتار کر لیا۔ گرفتار ملزمان کے خلاف تھانہ پنڈدادنخان میں مقدمہ درج کر کے قانونی کارروائی کا آغاز کر دیا گیا ہے۔
ترجمان کا کہنا ہے کہ یہ اقدامات خصوصاً نوجوانوں اور بچوں کو آبی حادثات سے محفوظ رکھنے کے لیے کیے جا رہے ہیں۔ پولیس نے والدین سے اپیل کی ہے کہ وہ اپنے بچوں کو دریاؤں، ندی نالوں اور نہروں میں نہانے سے روکیں اور ضلعی انتظامیہ کی جانب سے نافذ کردہ پابندی پر عمل کریں۔
ڈی پی او جہلم شفیق احمد چوہدری نے کہا کہ دفعہ 144 کی خلاف ورزی کرنے والوں کے خلاف بلاامتیاز قانونی کارروائیاں آئندہ بھی جاری رہیں گی اور کسی کو بھی انسانی جانوں کو خطرے میں ڈالنے کی اجازت نہیں دی جائے گی۔ انہوں نے مزید کہا کہ شہریوں کی جان و مال کا تحفظ جہلم پولیس کی اولین ترجیح ہے اور قانون شکن عناصر کے خلاف بھرپور کریک ڈاؤن جاری رکھا جائے گا۔
