جہلم: محکمہ موسمیات نے آئندہ دنوں میں ملک کے بیشتر علاقوں میں مزید مون سون بارشوں کی پیشگوئی کرتے ہوئے شہریوں کو الرٹ رہنے کی ہدایت کر دی۔
محکمہ موسمیات کے مطابق مرطوب ہوائیں شدت کے ساتھ ملک کے مختلف حصوں میں داخل ہو رہی ہیں، جس کے باعث وقفے وقفے سے موسلادھار بارشیں متوقع ہیں۔
تازہ ترین رپورٹ کے مطابق اسلام آباد اور پنجاب کے مختلف شہروں میں 14 سے 17 جولائی کے دوران موسلادھار بارشوں کا سلسلہ جاری رہنے کا امکان ہے۔ راولپنڈی، مری، گلیات اور جہلم میں شدید بارشوں کے ساتھ ندی نالوں میں طغیانی کا خدشہ ظاہر کیا گیا ہے۔
لاہور، گوجرانوالہ، حافظ آباد، سیالکوٹ اور نارووال میں بھی بارش کے ساتھ تیز ہوائیں چلنے کی توقع ہے، جبکہ مشرقی پنجاب کے مختلف علاقوں میں اربن فلڈنگ اور نشیبی علاقوں کے زیر آب آنے کا خطرہ بڑھ گیا ہے۔
محکمہ موسمیات کے مطابق راولپنڈی، مری، گلیات، ڈی جی خان سمیت دیگر علاقوں کے ندی نالوں میں طغیانی کا امکان ہے۔ نشیبی علاقے جیسے اسلام آباد، لاہور، ملتان، سیالکوٹ اور گوجرانوالہ میں بھی پانی جمع ہونے اور سیلابی کیفیت پیدا ہونے کا اندیشہ ہے۔
محکمہ موسمیات نے خبردار کیا ہے کہ موسلادھار بارشوں کے باعث بجلی، انٹرنیٹ اور ٹرانسپورٹ سروسز متاثر ہو سکتی ہیں، جبکہ کھڑی فصلوں کو بھی شدید نقصان پہنچنے کا خطرہ ہے۔ شہریوں کو احتیاطی تدابیر اختیار کرنے اور متعلقہ اداروں کی ہدایات پر عمل کرنے کی اپیل کی گئی ہے۔
