انڈونیشیا نے 20 ممالک کے شہریوں کو ویزا کے بغیر ملک میں آنے کی اجازت دینے کے لیے مںصوبے کا جلد اعلان کیا ہے۔
انڈونیشیا میں سیاحت اور تخلیقی معیشت کی وزارت نے سیاحت کی اہم مارکیٹوں پر توجہ مرکوز کرتے ہوئے 20 اضافی ممالک کے مسافروں کو ویزا کے بغیر ملک میں داخلے کی توسیع کے منصوبوں کا اعلان کیا ہے۔
یہ ویزا فری انٹری اس سال اکتوبر سے نافذ العمل ہوگی اور اس کی باضابطہ فہرست پہلے ہی پیش کی جا چکی ہے۔ انتخاب کا عمل قریباً مکمل ہوچکا ہے اور 20 ممالک کی فہرست بھی پیش کردی گئی ہے۔
وزارتِ سیاحت نے فہرست گزشتہ دسمبر میں مرتب کی تھی جس میں آسٹریلیا، چین، فرانس، جرمنی، بھارت، جاپان، قطر، جنوبی کوریا، برطانیہ اور امریکا جیسی اہم سیاحتی مارکیٹیں شامل ہیں۔ کوویڈ 19 کے بعد سماجی دوری کا پروٹوکول ختم ہونے کے بعد سیاحت اور معاشی ترقی کو فروغ دینے کے لیے سیاحوں کے داخلے کو آسان بنانے کی ترغیب دی گئی ہے۔
اعداد و شمار کے مطابق انڈونیشیا نے گزشتہ سال قریباً ایک کروڑ 17 لاکھ سیاحوں کا استقبال کیا تھا۔ جو دیگر جنوب مشرقی ایشیائی ممالک کے مقابلے میں کافی کم ہے۔ صرف 2024 کے پہلے 3 مہینوں میں قریباً 30 لاکھ غیر ملکی سیاح انڈونیشیا پہنچے تھے لیکن حکومت کا مقصد اس تعداد کو سال کے آخر تک ایک کروڑ 70 لاکھ تک بڑھانا ہے۔
