دینہ: رورل ہیلتھ سینٹر دینہ میں طبی خدمات، ادویات کی دستیابی، صفائی ستھرائی اور مجموعی انتظامی امور کا جائزہ لینے کے لیے اسسٹنٹ کمشنر دینہ ساجدہ رزاق نے معمول کا معائنہ کیا۔
اس موقع پر انہوں نے مرکز صحت کے مختلف شعبہ جات کا دورہ کرتے ہوئے مریضوں کو فراہم کیے جانے والے علاج معالجے، ادویات کی فراہمی، صفائی کے انتظامات اور مجموعی سروس ڈیلیوری کا تفصیلی جائزہ لیا۔
معائنے کے دوران مرکز صحت میں صفائی ستھرائی کی صورتحال تسلی بخش پائی گئی۔ اسسٹنٹ کمشنر ساجدہ رزاق نے مریضوں سے براہِ راست گفتگو کی اور ان سے علاج معالجے کی سہولیات، طبی عملے کے رویے اور ضروری ادویات کی دستیابی کے حوالے سے ان کی رائے دریافت کی۔
مریضوں کی جانب سے علاج معالجے اور ادویات کی فراہمی کے حوالے سے مثبت رائے سامنے آئی، جبکہ مرکز صحت کے مجموعی انتظامات بھی تسلی بخش پائے گئے۔ اسسٹنٹ کمشنر نے مرکز صحت کے مختلف حصوں کا جائزہ لیتے ہوئے فراہم کی جانے والی طبی سہولیات کے معیار کو برقرار رکھنے کی ضرورت پر زور دیا۔
اسسٹنٹ کمشنر ساجدہ رزاق نے مرکز صحت کی انتظامیہ کو ہدایت کی کہ مریضوں کو بروقت اور معیاری طبی خدمات کی فراہمی کو یقینی بنایا جائے اور موجودہ انتظامی و صفائی کے معیار کو برقرار رکھا جائے۔ انہوں نے ضروری ادویات کی مسلسل دستیابی، صفائی کے معیار میں تسلسل اور مریضوں کی موثر رہنمائی کے ساتھ مجموعی سروس ڈیلیوری کی باقاعدہ نگرانی جاری رکھنے پر بھی زور دیا۔
انہوں نے کہا کہ بنیادی مراکز صحت میں آنے والے مریضوں کو بہتر سہولیات کی فراہمی کے لیے انتظامی امور، ادویات کی دستیابی، صفائی اور مریضوں کی رہنمائی کے نظام پر مسلسل توجہ ضروری ہے تاکہ عوام کو ان کی دہلیز پر بہتر طبی سہولیات میسر آ سکیں۔
