جہلم پریس کلب کے چیئرمین چوہدری عابد محمود نے کہا ہے کہ ایک آزاد، ذمہ دار اور باوقار صحافت کسی بھی مہذب معاشرے کی بنیادی ضرورت ہے اور صحافیوں کے تحفظ کے ساتھ اظہارِ رائے کی آزادی کو یقینی بنانے کے لیے اجتماعی اقدامات ناگزیر ہیں۔
انہوں نے یہ بات آزادی صحافت کے حوالے سے میڈیا نمائندگان سے گفتگو کرتے ہوئے کہی۔ چوہدری عابد محمود کا کہنا تھا کہ صحافت محض خبر رسانی کا نام نہیں بلکہ یہ عوام کی آواز، حقائق کی ترجمانی اور ریاستی و سماجی نظام میں شفافیت کو یقینی بنانے کا ایک مؤثر ذریعہ ہے۔
انہوں نے کہا کہ صحافیوں کو چاہیے کہ وہ بلا خوف و خطر سچ کو سامنے لائیں، تاہم آزادی کے ساتھ ذمہ داری بھی جڑی ہوتی ہے۔ اس لیے ضروری ہے کہ صحافی دیانت، تحقیق اور توازن کے اصولوں کو مدنظر رکھتے ہوئے اپنے فرائض انجام دیں تاکہ معاشرے میں شعور اور مثبت سوچ کو فروغ دیا جا سکے۔
چوہدری عابد محمود نے مزید کہا کہ پاکستان سمیت دنیا بھر میں صحافیوں کو اپنے فرائض کی انجام دہی کے دوران مختلف خطرات، پابندیوں اور حتیٰ کہ جان کے نقصان جیسے مسائل کا سامنا کرنا پڑتا ہے، جو انتہائی تشویشناک ہے۔
انہوں نے حکومت سے مطالبہ کیا کہ صحافیوں کے تحفظ کے لیے قوانین میں مؤثر اور سخت ترامیم کی جائیں تاکہ صحافی بلا خوف و خطر عوامی مسائل، جرائم اور جرائم پیشہ عناصر کی نشاندہی کر سکیں اور ملک میں شفافیت اور قانون کی بالادستی کو فروغ دیا جا سکے۔
انہوں نے اس عزم کا اظہار بھی کیا کہ ذمہ دار صحافت کے ذریعے معاشرے میں امن، آگاہی اور مثبت تبدیلی کو فروغ دیا جا سکتا ہے، اور یہی ایک مستحکم اور ترقی یافتہ ریاست کی بنیاد ہے۔
